Respýblıka kúni qarsańynda Almatydaǵy Qazaqstan-Brıtan tehnıkalyq ýnıversıtetiniń aldyndaǵy alańda «Meniń elim – meniń bolashaǵym» atty patrıottyq fleshmob ótti, - dep habarlaıdy alnews.
İs-sharaǵa myń jas qatysyp, el bolashaǵyna úles qosýǵa daıyn ekenin bildirdi. Bul týraly qalalyq Jastar saıasaty basqarmasynyń ókilderi habarlady.
Fleshmob fortepıano men ansámbldiń súıemeldeýimen ótti. Qatysýshylar kólemi 14×7 metr bolatyn Qazaqstannyń Memlekettik týyn jaıyp, elimizdiń Ánuranyn birge shyrqady.
Baǵdarlamanyń negizgi bólimderiniń biri jastardyń Qazaqstanǵa arnaǵan úndeýi boldy. Qatysýshylarǵa «Qazaqstan, bolashaqta saǵan ne qaldyramyz?» degen suraq qoıyldy.
Jastar bilimdi urpaq tárbıeleý, qaýipsiz qoǵam qalyptastyrý, qorshaǵan ortany qorǵaý, ádildikti saqtaý jáne el táýelsizdigin nyǵaıtýǵa úles qosýǵa ýáde berdi.
«Men bilimdi Qazaqstandy qalyptastyramyn!», «Men qaýipsiz Qazaqstan quramyn!», «Men jasyl Qazaqstandy saqtaımyn!», «Ádiletti Qazaqstan úshin eńbek etemin!», «Qazaqstannyń táýelsizdigin nyǵaıtamyn!» degen ýádeler aıtyldy.
«Qazaqstan Prezıdenti Qasym-Jomart Toqaev jaýapty, bilimdi ári otanshyl azamattardy tárbıeleýdiń mańyzyn birneshe ret atap ótken bolatyn. İs-sharada aıtylǵan oılar «Adal azamat» tujyrymdamasynyń negizgi qaǵıdattarymen de úndesedi. Bul tujyrymdamada Otanǵa degen súıispenshilik eń aldymen naqty ispen, adal eńbekpen jáne qoǵamǵa paıda keltirýge daıyn bolýmen ólshenedi», – dedi aksıany uıymdastyrýshylar.
Olardyń aıtýynsha, is-shara jastardyń el bolashaǵy úshin jeke jaýapkershiligin arttyrýǵa jáne qoǵamdyq ómirge belsendi aralasýdyń mańyzyn kórsetýge baǵyttalǵan.
Fleshmob sońynda qatysýshylar Memlekettik Ánurandy birge oryndady.
