Almaty ákimi Darhan Satybaldy Respýblıka alańynda aıaqtalǵan kóriktendirý jumystarynyń nátıjesimen tanysty, - dep habarlaıdy alnews.
Jumys sapary barysynda oǵan qalanyń basty qoǵamdyq keńistikteriniń biri – Respýblıka alańyn qaıta jańǵyrtý qorytyndysy tanystyrylyp, sondaı-aq Sátbaev kóshesiniń Baızaqov kóshesinen Lýganskıı kóshesine deıingi aralyǵyn keshendi kórkeıtý jobasynyń júzege asyrylý barysy baıandaldy.
Jobanyń tujyrymdamasyn Ulybrıtanıanyń London qalasyndaǵy LDA Design kompanıasy ázirlegen. Bul jumysty Almaty qalasynyń Qoǵamdyq keńistikterdi damytý basqarmasy «qasbetten qasbetke deıin» qaǵıdaty negizinde júrgizdi.
Jobanyń basty maqsaty – júrginshilerge basymdyq beriletin, zamanaýı, qaýipsiz ári jaıly orta qalyptastyrý. Respýblıka alańynda kóriktendirilgen aýmaqtyń jalpy kólemi 4,5 gektar.
Alańda qoǵamdyq keńistiktiń jabyndary tolyq jańartylyp, ınjenerlik jeliler, syrtqy jaryqtandyrý jáne avtomattandyrylǵan sýarý júıesi zaman talabyna saı jańǵyrtyldy. Qurylys barysynda paıdalaný merzimi 10 jyldan zamanaýı, tózimdi materıaldar qoldanyldy. Bul aldaǵy ýaqytta aýmaqty kútip-ustaý shyǵynyn aıtarlyqtaı azaıtýǵa múmkindik beredi.
Kógaldandyrý jumystary aýqymdy kólemde júrgizildi. Alańǵa 233 iri aǵash, 63 myńnan astam buta jáne 17,7 myń kópjyldyq ósimdik egilip, kógaldar men bede jamylǵysy tóseldi. Keshki ýaqytta jasyl jelek sáýlettik-kórkem jaryqpen árlenip, qoǵamdyq keńistiktiń ajaryn asha túsedi. Sonymen birge, aýmaqqa 129 zamanaýı jaryq shamy ornatylyp, alań tolyq jaryqtandyryldy.
Turǵyndardyń jaıly demalysy úshin zamanaýı balalar oıyn alańdary, serýendeý joldary, demalys aımaqtary jáne eki amfıteatr salyndy. Sondaı-aq, alańda velosıped jolaqtary jasalyp, olar bolashaqta Sátbaev kóshesi boıymen ótetin biryńǵaı velojol jelisiniń quramyna enedi. Budan bólek, oryndyqtar, qoqys jáshikteri, velosıped turaqtary, ústelder, kreslolar, landshaftyq jıhazdar, arkalar jáne basqa da shaǵyn sáýlet nysandaryn qamtıtyn 500-den astam kóriktendirý elementi ornatyldy.
Jańartylǵan alańnyń basty erekshelikteriniń biri – qoǵamdyq keńistiktiń jańa landshaftyq kelbetin aıshyqtaıtyn segiz sándik sý aıdyny. Buǵan qosa, burynnan bar sýburqaqtar tolyq jóndeýden ótkizilip, zamanaýı jańa sýburqaq keshenderi salyndy. Olar qala turǵyndary men qonaqtarynyń súıikti demalys oryndarynyń birine aınalmaq.
Joba aıasynda kólik jáne jaıaý júrginshi ınfraqurylymyn jetildirýge de erekshe kóńil bólindi. Sátbaev kóshesinde jańa qoǵamdyq kólik aıaldamasy paıdalanýǵa berilip, qalanyń ákimshilik ári iskerlik ortalyǵyna qatynaý múmkindigi jaqsardy. Sonymen qatar qosymsha baǵdarshamdar ornatylyp, retteletin júrginshiler ótkelderi jasaldy jáne halyqtyń barlyq sanatyna qolaıly kedergisiz orta qalyptastyryldy.
Jobany iske asyrý barysynda eski jabyndar alynyp, jańa ınjenerlik komýnıkasıalar tartyldy, avtomatty sýarý júıesi, pavılondarǵa arnalǵan negizder jáne basqa da qajetti qurylys jumystary oryndaldy.
Joba tolyq aıaqtalǵan soń Sátbaev kóshesi boıynda birtutas zamanaýı qoǵamdyq keńistik qalyptasady. Al jańarǵan Respýblıka alańy Almatynyń eń kórikti ári tartymdy qoǵamdyq oryndarynyń biri retinde turǵyndar men qala qonaqtaryna serýendeýge, tynyǵýǵa, sportpen aınalysýǵa, mádenı is-sharalar men merekelik basqosýlar ótkizýge qolaıly meken bolmaq.
