Almatynyń Medeý aýdanynda memleket jáne qoǵam qaıratkeri, Uly Otan soǵysynyń ardageri Qaztaı Nurmanbetuly Ultaraqovtyń qurmetine memorıaldyq taqtanyń ashylý rásimi ótti, - dep habarlaıdy alnews.
Estelik taqta Qaztaı Ultaraqov turǵan Tólebaev kóshesi, 142-úıdiń qasbetine ornatyldy.
Qaztaı Ultaraqov 1942 jyly óz erkimen maıdanǵa attanǵan. Kalının maıdanynda áskerı qyzmet atqaryp, aldymen bólimshe, keıin vzvod jáne jeke shańǵyshylar batalónynyń komandıri boldy. 1943 jyly aýyr jaralanyp, áskerı erligi úshin Otan soǵysy jáne Qyzyl Juldyz ordenderimen marapattaldy.
Beıbit jyldary Qaztaı Ultaraqov basshylyq qyzmetter atqaryp, ekonomıka ǵylymdarynyń kandıdaty atandy. Ol kóptegen ǵylymı eńbek pen kitaptyń avtory boldy. Elge sińirgen eńbegi men memleketke adal qyzmeti úshin Lenın ordenimen, eki Eńbek Qyzyl Tý ordenimen, «Qurmet belgisi» ordenimen jáne birqatar medalmen marapattalǵan.
Saltanatty rásim barysynda qatysýshylar Qaztaı Ultaraqovtyń rýhyna taǵzym etip, onyń eldiń damýyna qosqan úlesin eske aldy.
Memorıaldyq taqtanyń ornatylýy – kórnekti tulǵanyń esimin ulyqtap, onyń ónegeli ómir joly men qala tarıhyndaǵy ornyn keıingi urpaq jadynda saqtaýǵa baǵyttalǵan.
