Almatyda Qazaqstan kınematografıasynyń tarıhyna arnalǵan jańa qoǵamdyq keńistiktiń tujyrymdamasy ázirlenip jatyr, - dep habarlaıdy alnews.
«Qazaqfılm» kınematografıalyq parkin serýendeýge, demalýǵa jáne otandyq kıno ónerimen tanysýǵa arnalǵan zamanaýı oryn retinde qurý josparlanyp otyr. Bul týraly qalanyń Qoǵamdyq keńistikterdi damytý basqarmasynyń ókilderi habarlady.
Tujyrymdamanyń negizine Qazaqstan kınosynyń tarıhyn qalalyq ortamen úılestirý ıdeıasy alynǵan. Keńistikte birneshe taqyryptyq aımaq qurý kózdelgen. Olardyń árqaısysy kelýshilerdi otandyq kınematografıanyń ár kezeńdegi damý tarıhymen tanystyrady.
Joba aıasynda serýendeýge arnalǵan aleıalar, ınteraktıvti jáne mýltımedıalyq ınstallásıalar, ashyq aspan astynda fılmder kórsetýge arnalǵan amfıteatr, balalar alańy men demalys aımaqtaryn salý qarastyrylǵan.
Qazaqstan kınosynyń tarıhyn vızýaldy elementter arqyly ǵana emes, zamanaýı ınteraktıvti formattar arqyly da tanystyrý kózdelip otyr. Bul kelýshilerge kınematografıanyń damý jolymen, aıtýly týyndylarmen jáne elimizdiń mádenı murasymen qoljetimdi ári zamanaýı formatta tanysýǵa múmkindik beredi.
Kınematografıalyq park mádenıet pen qala ómirin toǵystyratyn keńistik retinde qarastyrylǵan. Munda otandyq fılmderdiń kórsetilimderin, taqyryptyq kezdesýler men túrli mádenı is-sharalardy uıymdastyrý josparlanǵan.
