Almatyda qaladaǵy barlyq joǵary oqý ornynyń stýdentterine arnalǵan daǵdarys ortalyǵy ashyldy, - dep habarlaıdy alnews.
Jańa ortalyq Muhamedjan Tynyshpaev atyndaǵy ALT University-diń jańartylǵan №1 Stýdentter úıiniń bazasynda bir aı boıy jumys isteıdi. Munda ómirlik qıyn jaǵdaıǵa tap bolǵan jastar ýaqytsha turyp, keshendi qoldaý ala alady.
Ortalyqtyń basty ereksheligi – kómek tek ALT University stýdentterine ǵana kórsetilmeıdi. Ómirindegi túrli qıyndyqqa baılanysty ýaqytsha baspanasyz qalǵan nemese áleýmettik, psıhologıalyq ne konsýltasıalyq qoldaýdy qajet etetin Almatydaǵy kez kelgen joǵary oqý ornynyń stýdenti ortalyqqa júgine alady. Osy maqsatta Stýdentter úıinen 50 oryn bólindi.
Almaty qalasy Jastar saıasaty basqarmasy basshysynyń orynbasary Mıras Nysanálıevtiń aıtýynsha, daǵdarys ortalyǵynyń ashylýy stýdent jastardy qoldaýdyń qoldanystaǵy júıesin keńeıtip, jastardyń turmystyq máselesimen qatar áleýmettik qıyndyqtaryna da jedel den qoıýǵa múmkindik beredi.
«Almaty – elimizdegi eń iri stýdenttik ortalyq. Sondyqtan bilim alý úshin qalaǵa kelgen árbir jastyń qıyn jaǵdaıda jalǵyz qalmaıtynyn sezinýi biz úshin asa mańyzdy. Stýdentter ýaqytsha baspanasyz qalýdan bastap, psıhologıalyq nemese áleýmettik kómek qajet bolatyn túrli jaǵdaıǵa tap bolýy múmkin. Daǵdarys ortalyǵy qaı joǵary oqý ornynda bilim alatynyna qaramastan, ár stýdent qoldaý surap júgine alatyn oryn bolýy tıis. Bizdiń mindetimiz – ýaqytsha baspana berýmen ǵana shektelmeı, jastyń qıyn kezeńnen ótip, tolyqqandy oqýyna jáne qalypty ómirine oralýyna kómektesý», — dedi Almaty qalasy Jastar saıasaty basqarmasy basshysynyń orynbasary Mıras Nysanálıev.
Ortalyq Máýlenov kóshesi, 108A mekenjaıynda ornalasqan. Ǵımarat kúrdeli jóndeýden ótken. Jataqhana jalpy 487 orynǵa eseptelgen, ǵımarattyń aýmaǵy 7 myń sharshy metrden asady.
Qaıta jańǵyrtýdan keıin munda zamanaýı stýdenttik orta qalyptastyryldy: turǵyn bólmeler, as úıler men turmystyq úı-jaılar, óz betinshe daıyndalýǵa arnalǵan keńistikter, demalys bólmeleri, kir jýatyn oryn, sport aımaǵy jáne jattyǵý zaly jabdyqtaldy.
Daǵdarys ortalyǵynyń stýdentteri úshin oqý jáne turmystyq aımaqtary bar jeke turǵyn bólmeler, asúı modýlderi men sanıtarlyq-gıgıenalyq úı-jaılar qarastyrylǵan. Sondaı-aq olar sport zaly men medısınalyq pýnktti paıdalana alady. Qajet bolǵan jaǵdaıda medısınalyq pýnktte alǵashqy kómek kórsetiledi. Ortalyqta turǵan kezeńde jastar psıhologıalyq, áleýmettik jáne konsýltasıalyq qoldaý ala alady. Árbir ótinishtiń qupıalylyǵyn saqtaý jáne stýdenttiń jaǵdaıyna jeke qaraý ortalyq jumysynyń mańyzdy qaǵıdaty bolmaq.
QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhannyń aıtýynsha, mundaı jobalar stýdenttik ınfraqurylymdy damytý turǵysynan ǵana emes, bilim alýshylardy jan-jaqty qoldaý júıesin qalyptastyrý úshin de mańyzdy.
«Zamanaýı bilim berý ortasy – tek aýdıtorıalar, baǵdarlamalar men oqytý sapasy ǵana emes. Stýdenttiń qandaı jaǵdaıda turatyny jáne qıyn ómirlik jaǵdaıǵa tap bolǵanda qaıda júgine alatynyn bilýi de asa mańyzdy. Túrli joǵary oqý ornynyń stýdentterine qoljetimdi daǵdarys ortalyǵynyń ashylýy – osyndaı qoldaý júıesin damytýdaǵy mańyzdy qadam. Munda jastar ýaqytsha baspana, konsýltasıalyq, áleýmettik jáne psıhologıalyq kómek alyp, eń bastysy, oqýyn alańsyz jalǵastyrýǵa múmkindik alady», — dedi Aqerke Abylaıhan.
Qalalyq daǵdarys ortalyǵyn qurý ómirlik qıyn jaǵdaıǵa tap bolǵan Almaty stýdentterine jedel kómek kórsetýdiń qosymsha tetigin qalyptastyrýǵa baǵyttalǵan. Joba birneshe baǵytty – ýaqytsha baspana, áleýmettik beıimdeý, psıhologıalyq qoldaý jáne qaýipsiz ári jaıly jaǵdaıda oqýyn jalǵastyrý múmkindigin biriktiredi. Daǵdarys ortalyǵynyń baılanys nómirleri: +7 700 255 14 43, +7 700 950 95 28, +7 727 237 01 70.
