Qala kúni qarsańynda Almatynyń Áýezov aýdanynda jastarǵa arnalǵan jańa komúnıtı ortalyq ashyldy, - dep habarlaıdy alnews.
Aýmaǵy 400 sharshy metr bolatyn keńistikte shyǵarmashylyqpen aınalysýǵa, zamanaýı tehnologıany meńgerýge jáne jańa daǵdylardy damytýǵa jaǵdaı jasalǵan. Ortalyqtaǵy barlyq qyzmet jastar úshin tegin. Jańa ortalyqta dybys jazý stýdıasy, bı zaly, robototehnıka jáne 3D-modeldeý aımaǵy, sıfrlyq kontent ázirleýge arnalǵan keńistik, sondaı-aq bilim berý jáne keńes berý alańdary qarastyrylǵan. Bul týraly Almaty qalasy Jastar saıasaty basqarmasynyń ókilderi habarlady.
Ortalyqtyń múmkindikterimen Almaty qalasy ákiminiń orynbasary Abzal Núkenov tanysty. Jańa nysannyń iske qosylýy qala ákimi Darhan Satybaldynyń qoldaýymen júzege asyrylyp jatqan jastar ortalyqtary jelisin keńeıtý jumystarynyń bir bóligi boldy. Qazirgi ýaqytta Almatynyń barlyq aýdanynda osyndaı 12 alań jumys isteıdi.
«Jastar ortalyǵy tek is-shara ótkizetin oryn emes, jastardyń bilim alyp, damyp, ıdeıasyn júzege asyra alatyn keńistik bolýy mańyzdy», – dedi Abzal Núkenov.
Ortalyqtaǵy jańa jobalardyń biri «AI Kreator» kýrsy. Baǵdarlama aıasynda jastar kontent óndirisinde jasandy ıntellekt quraldaryn paıdalanýdy meńgeredi. Qatysýshylar ıdeıa men senarı ázirleýden bastap, vızýal, dybys jáne montaj jasaýǵa deıingi negizgi kezeńderdi úırenedi. Kýrstyń alǵashqy legine 20-ǵa jýyq adam jazylǵan.
Sonymen qatar dybys jazý stýdıasynda ánder men podkasttar jazýǵa, bı zalynda túrli vorkshoptar uıymdastyrýǵa múmkindik bar. Arnaıy kontent aımaǵy foto jáne beıne túsirýge arnalǵan. Al robototehnıka jáne 3D-modeldeý keńistiginde ortalyqtyń ashylýyna oraı Almatynyń basty nyshandarynyń biri alma beınelengen «Tilek aǵashy» ázirlendi.
Ortalyqtyń ashylýymen qatar «ALMATY 24 sagat» beınebaıqaýy bastaldy. Baıqaý sharty boıynsha qatysýshylar 24 saǵat ishinde Almaty, aýdany, súıikti oryndary nemese qala turǵyndary týraly qysqa beınerolık túsirýi kerek.
«Biz úshin árbir jastyń baǵytyn tabýyna – jańa daǵdy meńgerýine, tehnologıada nemese shyǵarmashylyqta ózin synap kórýine, ne bolmasa óz jobasyn iske qosýyna múmkindik bolýy mańyzdy», – dedi Almaty qalasy Jastar saıasaty basqarmasynyń basshysy Azız Kajdenbek.
Jyl basynan beri Almatydaǵy komúnıtı ortalyqtarynyń qyzmetin 10,6 myńnan astam jas paıdalanǵan. Olar jumysqa ornalasý jáne kásibı baǵdar boıynsha kómek alyp, psıhologıalyq jáne quqyqtyq keńesterge júgingen. Budan bólek, «Zań jáne tártip» baǵyty boıynsha 18 myńnan astam adamdy qamtyǵan 190-ǵa jýyq is-shara uıymdastyryldy. Al «Taza Qazaqstan» bastamasy aıasynda ótken 80-nen astam ekologıalyq aksıaǵa 10 myńnan astam jas almatylyq qatysty.
