Almatyda qala ákiminiń birinshi orynbasary Almasqan Smatlaevtyń tóraǵalyǵymen kóppáterli turǵyn úı qoryn basqarý jáne turǵyn úılerdi aldaǵy jylytý maýsymyna daıyndaý máselesine arnalǵan keńeıtilgen jumys keńesi ótti, - dep habarlaıdy alnews.
Jıynǵa jaýapty basqarmalar, aýdan ákimdikteri, Tótenshe jaǵdaılar departamenti, PIK jáne MIB qaýymdastyqtarynyń ókilderi, sondaı-aq kóppáterli turǵyn úılerdi basqarý organdarynyń tóraǵalary qatysty.
Keńeste turǵyn úı qoryn qys maýsymyna daıyndaý, PIK pen MIB jumysynyń tıimdiligin arttyrý, órt qaýipsizdigin qamtamasyz etý, ortaq múlikti kútip-ustaý jáne basqarý organdarynyń memlekettik organdarmen ózara is-qımyly máseleleri qaraldy.
Keńesti ashqan Almasqan Smatlaev kóppáterli turǵyn úılerdi sapaly kútip-ustaý qala qyzmetiniń basty mindetteriniń biri bolyp qala beretinin aıtty.
«Kóppáterli turǵyn úı qorynyń jaı-kúıi – bizdiń jumysymyzdyń tıimdiliginiń kórsetkishi. Negizgi mindetter – turǵyndardyń qaýipsizdigin qamtamasyz etý, úılerdi tıisti deńgeıde kútip-ustaý jáne zań buzýshylyqtardyń aldyn alý», – dedi Almasqan Smatlaev.
Almaty qalasynyń Komýnaldyq ınfraqurylym jáne turǵyn úı ınspeksıasy basqarmasynyń basshysy Sharhan Tursynbaev turǵyn úı qorynyń qazirgi jaǵdaıy týraly baıandama jasady.
«Turǵyndardyń kóppáterli úılerdi basqarý men kútip-ustaý sapasyna qoıatyn talaptary jyl saıyn artyp keledi. Sondyqtan basqarý organdary ashyq ári jarıa jumys isteýi, qajetti jóndeý jumystaryn ýaqytyly júrgizýi jáne turǵyn úı ıelerine qarjynyń qalaı jumsalǵany jóninde turaqty túrde esep berip otyrýǵa tıis», – dedi Sharhan Tursynbaev.
Keńes qorytyndysy boıynsha Almasqan Smatlaev kóppáterli turǵyn úılerdi jylytý maýsymyna sapaly daıyndaýdy, ortaq múlikti tekserýdi jáne birinshi kezekte atqarylatyn jóndeý jumystaryn aıqyndaýdy tapsyrdy. Sondaı-aq, tıisti basqarmalarǵa Tótenshe jaǵdaılar departamentimen birlesip órt qaýipsizdigi talaptarynyń saqtalýyna baqylaýdy kúsheıtý, turǵyn úılerdiń jertólelerinde ornalasqan komersıalyq nysandardy tekserý jáne anyqtalǵan zań buzýshylyqtardy joıý boıynsha sharalar qabyldaý júkteldi. Buǵan qosa, Polısıa departamentimen birlesip kóppáterli turǵyn úılerde zańnama talaptarynyń saqtalýyn qamtamasyz etýge baǵyttalǵan profılaktıkalyq jumystar kúsheıtiledi.
