Almatyda strategıalyq ekologıalyq baǵalaý aıasynda qalanyń Bas josparyna engiziletin túzetýler boıynsha qoǵamdyq tyńdaýlar ótip jatyr, - dep habarlaıdy alnews.
Basqosýdyń negizgi taqyryby – qalany ekologıalyq turǵydan ornyqty damytýǵa baǵyttalǵan damý senarıi.
Tyńdaý barysynda Almaty qalasy Energetıka jáne sýmen jabdyqtaý basqarmasynyń basshysy Nurbaqyt Serikbaı energetıkalyq jáne komýnaldyq ınfraqurylymdy damytýdyń negizgi baǵyttaryn tanystyrdy. Onyń aıtýynsha, negizgi mindetterdiń qatarynda salany sıfrlandyrý, sý resýrstaryn utymdy paıdalaný, elektr kóligine arnalǵan ınfraqurylymdy damytý jáne qalanyń ornyqty damýyna yqpal etetin jobalardy júzege asyrý bar.
Talqylaý barysynda turǵyndar halyq sanynyń artýy men turǵyn úı qurylysynyń qarqyndy júrýine baılanysty Almatyny aýyz sýmen qamtamasyz etý máselesine erekshe nazar aýdardy.
Qoıylǵan suraqtarǵa jaýap bergen Nurbaqyt Serikbaı sýmen jabdyqtaý júıesin damytý jumystary 2040 jylǵa deıingi uzaq merzimdi jospar aıasynda júrgizilip jatqanyn aıtty.
«Búginde sýmen jabdyqtaý máselesi eń aldymen Naýryzbaı aýdanynda jáne Bostandyq aýdanynyń keı bóliginde ózekti bolyp tur. Sý tapshylyǵynyń aldyn alý úshin jańa sý alý nysandaryn, súzgi stansıalaryn salý, qoldanystaǵy sý kózderiniń qýatyn keńeıtý jáne ınjenerlik jelilerdi jańǵyrtý boıynsha birqatar joba júzege asyrylyp jatyr», – dedi basqarma basshysy.
