Elimizdiń eń iri megapolısi Almaty qalasyn sýmen qamtamasyz etý óz aldyna kúrdeli másele sanalady. Halyq sanynyń jyl saıyn kóbeıip kele jatýyna, qala aýmaǵynyń keńeıýine jáne jańa turǵyn úıler sanynyn ósýine baılanysty qalany sýmen qamtamasyz etý máseleside strategıalyq is-qımyldardy talap ete bastady. Prezıdent Qasym-Jomart Toqaev ta shahardaǵy sý sharýashylǵyna qatysty máselelerdi ońtaıly sheshýdi, ony qalanyń bolashaq damý josparynda basty nazarǵa ustaýdy aıryqsha tapsyrǵan bolatyn. Ásirese ınjenerlik jáne áleýmettik ınfraqurylymdy jańǵyrtý, kásipkerlikti qoldaý jáne ındýstrıalyq negizdi nyǵaıtý jónindegi tapsyrmalarynda da aýyz sý máselesi basty nazarǵa alynǵan.
Almaty qalasyn sýmen qamtamasyz etý 6 negizgi sý kózi arqyly júzege asyp kele jatyr. Aıtalyq, Úlken jáne Kishi Almaty, Aqsaı, Qarǵaly ózenderinen jáne Almaty men Talǵar ken oryndarynyń jerasty sý jınaǵyshy arqyly sýmen qamtamasyz etiledi. Bıyl Talǵar jerasty sý jınaǵyshyn keńeıtip, qýatyn 60 paıyzǵa deıin arttyrý maqsatyndaǵy qurylystar qarqyndy júrgizildi. Qurylystyń jalpy barysyn Almaty ákimdigi ǵana emes, Úkimet pen Prezıdent ákimshiligi de óz qadaǵalaýyna alǵan.
Qala turǵyndaryn sýmen turaqty ári jetkilikti deńgeıde qamtamasyz etý maqsatynda Talǵar jerasty sý jınaǵyshynan táýligine 17 myń m3 kóleminde sý qoldanystaǵy jeliler tolyqtyryp otyrady. Joba qýattylyǵy 15 myń m3 bolatyn jańa 6 uńǵyma salýdy jáne qýattylyqty 60%-ǵa arttyra otyryp, 6 sorǵy stansasyndaǵy 14 sorǵyny tolyq aýystyrýdy kózdeıdi.
Atalǵan joba qalany sýmen qamtamasyz etýdegi jer ústi sýlaryna degen táýeldilikti qysqartý maqsatynda jasalǵan mańyzdy jobalardyń biri. Memleket basshysy óziniń Almatydaǵy jumys sapary kezinde jer ústi sýlaryna degen táýeldilikti barynsha qysqartý boıynsha naqty tapsyrmalar da bergen. Aıtalyq Byltyr 18 tamyzdaǵy Almaty qalasyn damytý máseleleri jónindegi keńeste seldiń kóbeıýi jáne ózen sýy laılanýynyń artýyna baılanysty Prezıdent qalanyń joǵarǵy bóligine aýyz sý berýdi shektemeý úshin keshendi jumystar jasalýyn tapsyrǵan.
Barlyq qala turǵyndaryn ortalyqtandyrǵan sýmen qamtý boıynsha da keshendi jumystar júrigizilip keledi. Byltyr osy maqsatta 117 shaqyrym sý qubyry salynyp, 46 shaqyrymy jańǵyrtyldy, bul Almaty turǵyndarynyń 99,3%-yn ortalyqtandyrylǵan sýmen qamtamasyz etýge múmkindik berdi. Alataý, Bostandyq jáne Naýryzbaı aýdandarynyń turǵyndaryn sýmen qamtý máselesin sheshý úshin 4 sý jınaǵysh qurylysy men jobasy júrgizilýde. Bıyl 142 shaqyrym ınjenerlik komýnıkasıa salý jáne 48 shaqyrym jelini jóndeý josparlanǵan. Qabyldanǵan sharalar jyl sońyna deıin turǵyndardyń 99,6%-yn ortalyq sýmen qamtýǵa jáne jelilerdiń tozý deńgeıin 53,8%-ǵa deıin tómendetýge múmkindik beredi.
The Alnews
