Almatyda Qazaqstan men Ortalyq Azıa elderiniń jas kóshbasshylaryn biriktirgen Almaty Youth Forum 2026 halyqaralyq jastar forýmy ótip jatyr, - dep habarlaıdy alnews.
Forýmnyń negizgi taqyryptary – jasandy ıntellekt, klımattyq tehnologıa, sıfrlyq qaýipsizdik, eriktilik jáne áleýmettik ınovasıa.
Forýmdy Almaty ákimdigi, Qazaqstandaǵy BUU Balalar qory (IýNISEF) jáne Almatynyń Eriktiler front keńsesi Turaqty damý jolyndaǵy halyqaralyq eriktiler jyly aıasynda uıymdastyrdy.
«Búginde jastardyń ıdeıasyn naqty jobalarǵa aınaldyryp, bastamalaryna memleket, halyqaralyq uıymdar men bıznes tarapynan qoldaý kórsetiletin orta qalyptastyrý asa mańyzdy. Almaty Youth Forum Qazaqstan men Ortalyq Azıa jastaryn turaqty damý men eriktiliktiń ortaq qundylyqtary tóńiregine biriktiretin osyndaı alańǵa aınaldy», – dedi Almaty qalasy Jastar saıasaty basqarmasynyń basshysy Azız Kajdenbek.
Eki kúnge josparlanǵan forým baǵdarlamasyna paneldik pikirtalastar, praktıkalyq vorkshoptar jáne jasandy ıntellekt, qarjylyq saýattylyq, turaqty damý men ınvestısıa salasyndaǵy sarapshylardyń baıandamalary engizilgen.
Forýmnyń mańyzdy oqıǵalarynyń biri ál-Farabı atyndaǵy Qazaq ulttyq ýnıversıtetiniń bazasynda UNICEF Zhastary Hub ortalyǵynyń qurylatyny týraly jarıalanýy boldy. IýNISEF pen ýnıversıtet arasynda yntymaqtastyq týraly memorandýmǵa qol qoıyldy. Jańa hab eriktilik pen jastar bastamalaryn damytýǵa arnalǵan alańǵa aınalady.
Forým aıasynda jastar jobalarynyń kórmesi de uıymdastyryldy. Qazaqstan men Qyrǵyzstannan kelip túsken 211 ótinimniń ishinen 29 joba fınalǵa ótti. Olardyń qatarynda jasandy ıntellekt pen spýtnıktik derekterdi paıdalana otyryp, muzdyq kólderdiń jarylý qaýpin erte eskertýge arnalǵan GLOFcast júıesi, ónerkásiptik kásiporyndardaǵy qaýipsizdikti arttyrýǵa baǵyttalǵan Samruq.AI jobasy jáne avtokólikterden shyǵatyn zıandy shyǵaryndylardy azaıtýǵa arnalǵan EcoTube jobasy bar.
11 tamyzda forým Almaty Museum of Arts seriktestigimen jalǵasady. Qatysýshylardy shyǵarmashylyq sesıalar, pikirtalastar jáne jastar jobalary baıqaýynyń fınaly kútedi. Fınalda on komanda jobalaryn sarapshylar alqasyna tanystyrady. Úzdik jobalarǵa bastamalaryn ári qaraı damytý úshin mentorlyq qoldaý kórsetiledi.
