2026 jyldyń 25 aqpanynda Almaty qalasynda Qazaqstan Respýblıkasynyń Ulttyq ǵylym akademıasynyń 80 jyldyq mereıtoıy aıasynda «Halyqaralyq qatynastar» zertteý ortalyǵy resmı túrde ashylyp, «Ortalyq Azıa muraty» atty alty kitaptan turatyn ǵylymı-saraptamalyq toptamasynyń tusaýkeseri ótti, - dep habarlaıdy alnews.
İs-sharanyń basty maqsaty – halyqaralyq qatynastar salasyndaǵy zertteýlerdi ınstıtýsıonaldyq turǵyda júıeleý, Ortalyq Azıaǵa qatysty ǵylymı taldaýlardyń sapasyn arttyrý jáne óńirlik zıatkerlik dıalogty turaqty ǵylymı yntymaqtastyq deńgeıine kóterý. Sonymen qatar, ǵylymı oıdy júıeli, táýelsiz jáne tereń damytý arqyly memleketke strategıalyq, utymdy sheshim qabyldaý múmkindigin qamtamasyz etý kózdelgen.
Saltanatty jıynǵa QR Ulttyq ǵylym akademıasynyń Basqarma Prezıdenti A. Kúrishbaev, QR Syrtqy ister mınıstrliginiń Almaty qalasyndaǵy ókildigi, Birikken Ulttar Uıymynyń Jahandyq komýnıkasıalar departamentiniń Almaty qalasyndaǵy basshysy Vlastımıl Samek, sondaı-aq Qytaı Halyq Respýblıkasy, Qyrǵyz Respýblıkasy, Ózbekstan Respýblıkasy, Tájikstan Respýblıkasy, Túrikmenstan Respýblıkasynyń dıplomatıalyq ókilderi, halyqaralyq uıymdar men ǵylymı qaýymdastyq músheleri jáne jetekshi sarapshylar qatysty.
İs-shara aıasynda «Ortalyq Azıa muraty» ǵylymı-saraptamalyq toptamasyna engen basylymdardyń tusaýkeseri ótti:
- D.Q. Jekenov, «Ortalyq Azıa muraty» monografıasy;
- A.E. Mýhametjan, «Qyrǵyz Respýblıkasy»;
- G.A. Apsattarova, «Ózbekstan Respýblıkasy»;
- O.A. Baısalbek, «Túrikmenstan»;
- B.B. Sarıeva, «Tájikstan Respýblıkasy»;
- F.A. Qydyrbek, «Qytaı – Ortalyq Azıa qatynastary: taldaý jáne jylnama».
A. Kúrishbaev óz sózinde bul bastamanyń bolashaqqa baǵyttalǵan mańyzdy qadam ekenin atap ótip, ǵylymı oı tek júıeli, táýelsiz jáne tereń bolǵan jaǵdaıda ǵana memleketke strategıalyq sheshim qabyldaýǵa múmkindik beretinin jetkizdi.
Sonymen qatar, akademıanyń basty mısıasy – ǵylymdy qoǵam men memlekettiń strategıalyq damýyna qyzmet etetin ıntellektýaldyq resýrsqa aınaldyrý, halyqaralyq ǵylymı yqpaldastyqty keńeıtý, pánaralyq zertteýlerdi damytý jáne jas ǵalymdardyń áleýetin arttyrý bolyp tabylady.
Barlyq qatysýshylarǵa qoldaý kórsetkeni jáne yntymaqtastyqqa ashyqtyǵy úshin alǵys bildiremiz. Aldaǵy ýaqytta birlesken jobalardy damytý, tájirıbe almasý jáne ǵylymı baılanystardy nyǵaıtý baǵytynda ózara árekettesýdi jalǵastyrýǵa úmittenemiz.
