№4 Qalalyq klınıkalyq aýrýhana bazasynda aýyr jaraqat alǵan jáne tirek-qımyl apparaty aýrýlary bar pasıentterge kómek kórsetýge arnalǵan mamandandyrylǵan ortalyq quryldy, - dep habarlaıdy alnews.
Ortalyq shuǵyl dıagnostıkadan jáne joǵary tehnologıalyq otadan bastap, qalpyna keltirý men medısınalyq ońaltýǵa deıingi kómektiń tolyq sıklin qamtamasyz etýge múmkindik beredi. Emdeý TMKKK jáne MÁMS aıasynda júrgiziledi.
Munda aýyr jaraqattar men synyqtar kezinde kúrdeli ári joǵary tehnologıalyq ota jasalyp, endoprotezdeý, rekonstrýktıvti jáne az ınvazıvti aralasýlar júrgiziledi. Sondaı-aq zaqymdanǵan súıekter men býyndardy qalpyna keltirý jumystary atqarylady.
«Óńirlik travmatologıa jáne ortopedıa ortalyǵynyń qurylýy jaraqattar men tirek-qımyl apparaty aýrýlaryn dıagnostıkalaý jáne emdeýdiń zamanaýı tásilderin biriktirýge, mamandandyrylǵan kómektiń qoljetimdiligin arttyrýǵa jáne medısınalyq qyzmettiń barlyq deńgeıinde emdeý sabaqtastyǵyn qamtamasyz etýge múmkindik beredi», — dedi ortalyqtyń ashylýyna qatysqan Almaty qalasy Qoǵamdyq densaýlyq saqtaý basqarmasynyń basshysy Marat Pashımov.
Ortalyq mamandardy oqytý jáne olardyń biliktiligin arttyrý, sondaı-aq ǵylymı-zertteý jumystaryn júrgizý alańyna aınalady.
№4 Qalalyq klınıkalyq aýrýhana jyl saıyn 19 myńnan astam pasıent qabyldaıdy, munda shamamen 12 myń ota jasalady. 2025 jyly iri býyndardy endoprotezdeý boıynsha 2250 ota jasalǵan.
Ortalyqty qurý aıasynda qabyldaý bóliminiń tujyrymdamasy tolyǵymen jańartylyp, Almaty qalasy men Almaty oblysynyń travmatologıalyq qyzmetteri arasyndaǵy úılestirý kúsheıtildi.
№4 Qalalyq klınıkalyq aýrýhana aýmaǵynda qala stasıonarlarynyń arasynda jalǵyz tikushaq alańy jumys isteıdi. Ol aýyr jaraqat alǵan pasıentterdi, sonyń ishinde TJM qutqarýshylary taýly jáne jetýi qıyn aımaqtardan evakýasıalaǵan adamdardy jedel jetkizýge múmkindik beredi.
Ortalyq qurý bastamasy buǵan deıin jaraqattaný, jedel medısınalyq kómek jáne medısınalyq avıasıa máseleleri jónindegi Úılestirý keńesiniń oń baǵasyn alǵan.
Ortalyqtyń ashylýy aıasynda seriktes bank №4 Qalalyq klınıkalyq aýrýhanaǵa jańa jedel járdem avtokóligin tabystady.
