Muǵalim kúni Almatyda qala pedagogterin marapattaýǵa arnalǵan saltanatty rásim ótti, - dep habarlaıdy alnews.
Almaty ákimi Darhan Satybaldy ustazdar qaýymyn kásibı merekesimen quttyqtap, memlekettik nagradalardy tabystady.
«Sizderdi kásibı merekelerińiz – Muǵalim kúnimen shyn júrekten quttyqtaımyn! Memleket basshysy Qasym-Jomart Kemeluly Toqaev óziniń «Ádiletti qoǵamǵa – shynshyl sóz» atty eńbeginde: «Ustazdar qaýymy ulttyń jańa sapasyn qalyptastyrady. Muǵalim bolyp, urpaq tárbıeleý – qasıetti mısıa» – dep pedagogterdiń qoǵamdaǵy róli men qyzmetine aıryqsha baǵa bergen bolatyn. Sıfrlyq dáýirge qadam basqan tusta muǵalimderimizge qoıylatyn talap ta joǵary. Jasandy ıntellekt damyp, tehnologıa udaıy jańaryp, kásip túrleri jıi ózgeriske túsýde. Biraq bala boıyna bilim men jigerdi, parasat pen izgilikti darytatyn Ustaz tulǵasy qashanda óz bıiginde qala bermek», – dedi Almaty ákimi.
Ol búginde qalanyń bilim berý júıesinde 42 myńnan astam pedagog eńbek etetinin jetkizdi. Almatylyq ustazdar qalanyń kórnekti pedagogteri salǵan sara joldy jalǵastyryp keledi. Aıagúl Tóreqyzy Mırazova «Qazaqstannyń Eńbek Eri» joǵary ataǵyna ıe bolǵan alǵashqy pedagog atandy. 2024 jyly bul joǵary ataq №4 mektep-ınternattyń matematıka páni muǵalimi Gúljanar Moldakerimqyzy Nurpeıisovaǵa berildi. Qazirgi tańda Almatynyń 16 pedagogi «Qazaqstannyń eńbek sińirgen ustazy» qurmetti ataǵyn ıelendi.
«Bul Almatyda qalyptasqan myqty pedagogıkalyq mekteptiń, ustazdyq dástúr men kásibı sabaqtastyqtyń naqty nátıjesi», – dedi Darhan Satybaldy.
Memleket aldyndaǵy aıryqsha eńbegi jáne bilim berý salasyndaǵy eleýli jetistigi úshin almatylyq tórt pedagog «Qurmet» ordenimen marapattaldy.
Memlekettik nagradaǵa 53 jyldyq eńbek ótili bar Respýblıkalyq fızıka-matematıka mektebiniń fızıka páni muǵalimi Sabyr Tuıaqbaev, 50 jylyn bilim berý salasyna arnaǵan eńbek ardageri Toqtar Abaılda, 37 jyldyq eńbek ótili bar №138 gımnazıanyń bastaýysh synyp muǵalimi Elmıra Ábdirasylova jáne bilim berý salasynda 33 jyldan beri eńbek etip kele jatqan №7 arnaıy mektep-ınternattyń logoped muǵalimi Alma Seksenova ıe boldy.
№87 jalpy bilim beretin mekteptiń aǵylshyn tili páni muǵalimi, 47 jylyn pedagogıkalyq qyzmetke arnaǵan Natalá Zýbenko «Eren eńbegi úshin» medalimen marapattaldy.
Taǵy bes pedagog qala ákiminiń Alǵys hatymen marapattaldy. Olardyń qatarynda «Almaty daryny» ortalyǵy bóliminiń meńgerýshisi Jibek Sybanbaeva, №178 mamandandyrylǵan lıseı dırektorynyń orynbasary Gúlnafıs Dáýletbaeva, №136 mektep-gımnazıanyń qazaq tili men ádebıeti páni muǵalimi Nurgúl Jumanbek, №44 mektep-gımnazıanyń aǵylshyn tili páni muǵalimi Sýsanna Zeınalova jáne №174 mektep-gımnazıanyń matematıka páni muǵalimi Dámen Saǵatbek bar.
Sondaı-aq rásim barysynda jas pedagogter arasyndaǵy dástúrli «Almaty ustazy – 2026» qalalyq baıqaýynyń jeńimpazdary marapattaldy. Baıqaýda úzdik atanǵan jeti pedagog Qytaıda halyqaralyq taǵylymdamadan ótetin boldy. Olar Almaty mektepterinde tarıh, geografıa, bıologıa, qazaq tili men ádebıeti, fızıka, aǵylshyn tili jáne hımıa pánderinen sabaq beredi.
«Almaty ustazy – 2026» baıqaýynyń Bas júldesin №92 mamandandyrylǵan lıseıdiń hımıa páni muǵalimi Myqtybek Táńirbergen Baqytjanuly ıelendi. Jeńimpazǵa 5 mln teńge kólemindegi sertıfıkat jáne Qytaıda halyqaralyq taǵylymdamadan ótýge arnalǵan sertıfıkat tabystaldy.
Baıqaý fınalyna qala mektepteri men túrli pándik baǵyttardy tanystyrǵan jeti pedagog shyqty. Jas mamandardy qoldaý, ustaz mamandyǵynyń bedelin arttyrý jáne pedagogterdiń kásibı damýyna jaǵdaı jasaý Almatynyń bilim berý júıesindegi basym baǵyttardyń biri bolyp qala beredi.
