2025 jyldyń qorytyndysy boıynsha Almatyda kreatıvti ındýstrıa salasynda 21,5 myń kásipkerlik sýbektisi tirkelgen, - dep habarlaıdy alnews.
Salanyń jalpy qosylǵan quny 672 mlrd teńgege jetip, búdjetke 49,4 mlrd teńge salyq tústi. Al negizgi kapıtalǵa salynǵan ınvestısıa kólemi 4,5 ese artyp, 65 mlrd teńge boldy. Bul týraly Almaty qalasy Týrızm basqarmasynyń ókilderi habarlady.
Kreatıvti ındýstrıa mýzyka, kıno, dızaın, sán, sáýlet, medıa, sıfrlyq kontent jáne is-sharalar salalaryn qamtıdy. Basqarma málimetinshe, salanyń ekonomıkalyq kórsetkishterimen qatar, qaladaǵy mádenı keńistikter men iri shyǵarmashylyq jobalardyń sany da artyp keledi.
2025 jyly qyrkúıekte Almatyda aýmaǵy 10 myń sharshy metrden asatyn Almaty Museum of Arts ashyldy. Sondaı-aq «Selınnyı» zamanaýı mádenıet ortalyǵy jumysyn bastady. Shaharda halyqaralyq deńgeıdegi konsertter men festıválder de ótkizilip keledi.
Kreatıvti ındýstrıa salasyndaǵy aldaǵy mańyzdy sharalardyń biri – 11 qarashada Almaty Arena-da ótetin THE ICONIC CREATOR AWARDS 2026. Bıyl premıa alǵash ret Qazaqstan, Qyrǵyzstan jáne Ózbekstannyń kreatıvti ındýstrıa ókilderin bir alańda toǵystyrady.
Almatyda avtorlar, artıser, rejıserler, dızaınerler, kásipkerler, prodúserler, sáýletshiler, medıa jáne digital-ındýstrıa ókilderi bas qosady. Syılyq mýzyka, kıno jáne beıneleý ónerinen bastap sáýlet, oıyn ındýstrıasy men kreatıvti tehnologıaǵa deıin 15 baǵytty qamtıdy. Barlyǵy 100 negizgi jáne toǵyz arnaıy marapat tabystalady.
Kreatıvti ındýstrıa salasyndaǵy iri halyqaralyq is-sharalardy ótkizý Almatydaǵy oqıǵaly týrızmdi damytýdyń mańyzdy baǵyttarynyń biri retinde de qarastyrylyp otyr. Mundaı is-sharalar qalaǵa shetelden qatysýshylar men qonaqtardy tartyp, Ortalyq Azıanyń kreatıvti ındýstrıa ókilderi arasynda jańa seriktestik ornatýǵa jol ashady.
