Almatyda turǵyndar men qala ınfraqurylymy nysandaryna joǵary qaýip tóndirgen kóshkin qaýpi eń joǵary toǵyz ýchaskede betkeılerdi nyǵaıtý jumystary aıaqtaldy, - dep habarlaıdy alnews.
Medeý aýdanynda «Medeý» bıik taýly muz aıdyny mańyndaǵy betkeı, «Shymbulaq» taý shańǵysy kýrortyna baratyn avtojol ýchaskesi, «Keńsaı-2» zıratyna aparatyn jol, sondaı-aq «Medeý» bıik taýly sport kesheni aýmaǵyndaǵy «Sarysaı» bógetine aparatyn evakýasıalyq jol boıyndaǵy betkeıler nyǵaıtyldy.
Sondaı-aq, Jetisý aýdanyndaǵy úsh ýchaskede – Qojamıarov kóshesinde, Palladın kóshesiniń boıynda jáne «Kemel» zıraty aýmaǵynda jumystar júrgizildi. Naýryzbaı aýdanynda «Medeý» tutyný kooperatıvindegi Ýsıkov kóshesiniń boıyndaǵy ýchaske men «Aqjartaý» baý-baqsha seriktestigine kireberis joldaǵy betkeıler bekitildi.
Betkeılerdi nyǵaıtý jumystary 2025 jylǵy qazanda tabıǵı sıpattaǵy tótenshe jaǵdaıdyń saldaryn joıý jónindegi is-sharalar aıasynda bastaldy. Búginde ınjenerlik jumystar tolyq kólemde aıaqtalyp, aýmaqtardy kórkeıtý jumystary aıaqtalyp keledi. Qabyldanǵan ınjenerlik sheshimderdiń arqasynda atalǵan aýmaqtarda kóshkin úderisteriniń týyndaý qaýpi edáýir tómendedi.
Sonymen qatar qalada yqtımal qaýipti betkeılerdi tekserý jumystary jalǵasýda. Bıyl Jumyldyrý daıyndyǵy, aýmaqtyq jáne azamattyq qorǵanys basqarmasynyń, Almaty qalasy Tótenshe jaǵdaılar departamentiniń, «Qazseldenqorǵaý» memlekettik mekemesiniń, Geografıa jáne sý qaýipsizdigi ınstıtýtynyń jáne aýdan ákimdikteriniń mamandarynan quralǵan jumys toby kóshkin úderisteriniń damý qaýpi joǵary taǵy jeti ýchaskeni anyqtady. Qazirgi ýaqytta olar boıynsha jobalyq sheshimder ázirlenip jatyr. Odan keıin betkeılerdi bekitý jumystary júrgiziledi.
Sel, kóshkin jáne qar kóshkini qaýpi bar ýchaskelerde tótenshe jaǵdaıdyń aldyn alý maqsatynda aqparattyq-eskertý qalqandary ornatylyp jatyr. Sonymen qatar turǵyndar men týrıserge qolaısyz aýa raıy týraly SMS-habarlama arqyly jedel aqparat beriledi. Qaýip deńgeıi joǵary kezeńde Shymbulaq mańyna jáne Úlken Almaty kóline, keıbir taý baǵyttaryna barýǵa ýaqytsha shekteý engiziledi.
