Almatyda Kóriktendirý qaǵıdalarynyń saqtalýyna baqylaý kúsheıtildi

Almatyda qalanyń Kóriktendirý qaǵıdalarynyń saqtalýyn baqylaý jumystary jalǵasýda. Jyl basynan beri zańdy tulǵalar 8 972 kóriktendirý tólqujatyn rásimdep, josparly kórsetkishten asyp tústi. Bul týraly qalalyq Komýnaldyq ınfraqurylym jáne turǵyn úı ınspeksıasy basqarmasynyń ókilderi aıtty.
 
Kóriktendirý tólqujaty – menshik ıesi nemese paıdalanýshynyń ózine tıesili nysanǵa irgeles aýmaqty kútip ustaýǵa jaýapty ekenin rastaıtyn qujat.
 
Bıylǵy jyldyń alǵashqy jartyjyldyǵynda basqarma mamandary 5 myńǵa jýyq aýyzsha eskertý jasap, Ákimshilik quqyq buzýshylyq týraly kodekstiń 505-baby boıynsha 9 679 ákimshilik materıal rásimdedi. Salynǵan aıyppuldardyń jalpy somasy 111,9 mln teńge boldy.
 
Qala ákiminiń tapsyrmasymen kóriktendirý tólqujatyn rásimdeý naýqany qaıta jandanǵannan keıin qosymsha 672 pasport berildi. Osy kezeńde 547 ákimshilik materıal rásimdelip, salynǵan aıyppuldardyń jalpy somasy 12,7 mln teńgeden asty.
 
Basqarma ókilderiniń aıtýynsha, bul sharalar nysan ıeleriniń jaýapkershiligin arttyryp, qala aýmaǵynda tazalyq pen tártipti saqtaýǵa baǵyttalǵan.