Almatynyń Bostandyq aýdany ákimdiginde qalanyń Atmosferalyq aýany qorǵaý qaǵıdalaryn iske asyrý aıasynda shaǵyn jáne orta bıznes ókilderimen kezekti aqparattyq-túsindirý kezdesýi ótti, - soobshaet alnews.
«Eco Almaty» JSHS mamandary kásipkerlerge jańa ekologıalyq talaptar, gazdandyrylǵan aýdandarda qatty otynnan kezeń-kezeńimen bas tartý, shyǵaryndylardy tazartý júıelerin ornatý qajettiligi, sondaı-aq tómen emısıaly aımaqtyń (LEZ) pılottyq jobasyn iske asyrý jóninde túsindirý jumystaryn júrgizdi.
Kezdesý barysynda Bostandyq aýdanyndaǵy ekologıalyq ahýalǵa erekshe nazar aýdaryldy. Búginde ekologtar teksergen nysandardyń úshten birine jýyǵy áli de qatty otyndy paıdalanyp keledi. Onyń ishinde 52 qoǵamdyq tamaqtaný orny, 8 monsha kesheni jáne 1 avtoservıs bar. Jalpy aýdanda shaǵyn jáne orta bızneske tıesili 202 nysan tekserildi. Onyń ishinde 62 avtoservıs, 103 qoǵamdyq tamaqtaný orny jáne 37 monsha kesheni qamtyldy. Atalǵan nysandardan atmosferaǵa jyl saıyn 617 tonnadan astam lastaýshy zattar shyǵarylady. Bul derekter kásipkerlermen aldaǵy túsindirý jumystaryn júrgizýge negiz boldy.
