Almatyda qala sharýashylyǵyn 2026-2027 jyldardaǵy jylytý maýsymyna daıyndaý jumystary jalǵasyp keledi, - dep habarlaıdy alnews.
Almaty ákimi Darhan Satybaldynyń tóraǵalyǵymen ótken keńeste jumys barysy talqylandy. Komýnaldyq jáne energetıkalyq kásiporyndar bekitilgen kestege sáıkes tıisti is-sharalardy oryndaýda.
Ásirese, turǵyn úı qory men áleýmettik nysandarǵa erekshe nazar aýdarylyp otyr. Búginde kóppáterli turǵyn úılerdiń basym bóligi qysqa daıyn. Bilim berý men densaýlyq saqtaý nysandaryndaǵy daıyndyq jumystary da tolyq aıaqtalǵan.
Jylý kózderi men ınjenerlik jelilerde gıdravlıkalyq synaqtar júrgizilip, aǵymdaǵy jóndeý jáne jańǵyrtý jumystary jalǵasýda. Bıyl 20 shaqyrymnan astam jylý jelisin jańartý josparlanǵan. Sonymen qatar jylý oqshaýlaǵyshtary aýystyrylyp, negizgi jabdyqtar qysqy júktemege daıyndaý kózdelgen.
Qalalyq jylý kózderinde negizgi jabdyqtar jóndelip, qajetti otyn qory jasaqtalyp jatyr. Josparlanǵan is-sharalardyń basym bóligi oryndaldy. Qazandyqtar daıyndyqtyń sońǵy kezeńinen ótip, iske qosý-baptaý jumystary qolǵa alynǵan.
Sondaı-aq, elektr ınfraqurylymyn jańǵyrtý jumystary da jalǵasyp jatyr. Elektr berý jelileri, qosalqy stansıalar men transformatorlyq jabdyqtar jańartylýda. Gazben, sýmen jabdyqtaý jáne sý burý júıelerinde de josparly jumystar júrgizilýde.
Qalanyń tirshiligin qamtamasyz etetin ózge de júıelerdi daıyndaý jalǵasýda. Gaz qubyrlarynyń josparlanǵan ýchaskelerin qaıta jańǵyrtý jumystary aıaqtalýǵa jaqyn, jabdyqtarǵa tehnıkalyq qyzmet kórsetilýde. Sýmen jabdyqtaý jáne sý burý júıelerinde de ınjenerlik jelilerdi qaıta jańǵyrtý jumystary júrgizilip jatyr.
Komýnaldyq jáne energetıkalyq kásiporyndar sýyq túskenge deıin qys mezgilinde qala ınfraqurylymynyń turaqty jumysyn qamtamasyz etý úshin qalǵan jóndeý jáne iske qosý-baptaý jumystaryn aıaqtaýǵa tıis.
