Almatyda jylý energıasyn tutynýshylarǵa arnalǵan «Qaryzdy ótep, ósimpuldan qutyl!» aksıasy bastaldy. Aksıa aıasynda turǵyndar jylý jáne ystyq sýmen jabdyqtaý qyzmetteri úshin negizgi qaryzyn tolyq ótegen jaǵdaıda eseptelgen ósimpuldan bosatylady. Bul týraly «Almaty jylý júıesi» JSHS ókilderi habarlady.
Sonymen qatar bul múmkindik boryshkerlerdiń múlkine jáne bank shottaryna qoıylǵan tyıymdar men shekteýlerdi alyp tastaýǵa da jol ashady.
Aksıaǵa qatysý úshin bıyl tamyz aıynan jeltoqsannyń sońyna deıin negizgi qaryzdy tolyq óteý qajet. Odan keıin «Almaty jylý júıesi» JSHS-ne ótinish, eGov mobile arqyly alynǵan jeke kýáliktiń sıfrlyq nusqasy jáne negizgi qaryzdyń tólengenin rastaıtyn qujatty (kasalyq chek) info@alts.kz elektrondyq poshtasyna joldaý qajet nemese turǵylyqty jeri boıynsha tutynýshylarǵa qyzmet kórsetý ortalyqtarynyń birine júginý kerek.
Bereshek mólsheri nemese jylý energıasy úshin eseptelgen tólemder boıynsha keńes alý úshin «Almaty jylý júıesi» anyqtama qyzmetiniń 341-07-77 nómirine habarlasýǵa bolady. Sondaı-aq, +7 (775) 990-50-63 WhatsApp nómiri jumys isteıdi (tek habarlama qabyldaıdy).
Bereshek belgilengen merzimde ótelmegen jaǵdaıda tutynýshylar jylýmen jabdyqtaý qyzmetinen ajyratylyp, qaryz sot tártibimen óndiriledi.
