Almatyda jyl sońyna deıin Shuǵyla jáne Altaı-1 shaǵynaýdandarynda, sondaı-aq Almaly aýdanyndaǵy Áıteke bı kóshesinde úsh jańa emhananyń qurylysyn aıaqtaý josparlanǵan, - dep habarlaıdy alnews.
Árqaısysy bir aýysymda 500 adamǵa deıin qabyldaı alady. Bul týraly Almaty qalasy Qurylys basqarmasynyń ókilderi aıtty.
Jańa nysandar turǵyndardyń medısınalyq kómekke qoljetimdiligin arttyryp, qoldanystaǵy emhanalarǵa túsetin júktemeni azaıtady.
Naýryzbaı aýdanyndaǵy Shuǵyla shaǵynaýdanynda salynyp jatqan emhananyń aýmaǵy 12 myń sharshy metrden asady. Medısınalyq mekeme eki aýysymda jumys istep, kúnine myń adamǵa deıin qabyldaıdy.
Munda eresekter jáne balalar bólimshesi, áıelder konsýltasıasy, klınıkalyq-dıagnostıkalyq zerthana, fýnksıonaldyq dıagnostıka jáne medısınalyq ońaltý bólimsheleri ornalasady. Sondaı-aq, 26 oryndyq kúndizgi stasıonar men ambýlatorıalyq hırýrgıa ortalyǵy jumys isteıdi.
Taǵy bir emhana Almaly aýdanyndaǵy Áıteke bı kóshesinde salynyp jatyr. Aýmaǵy 8 myń sharshy metrden asatyn bes qabatty ǵımarat shamamen 30 myń tirkelgen turǵynǵa qyzmet kórsetýge eseptelgen.
Emhanada terapıa jáne pedıatrıa bólimsheleri, jalpy praktıka dárigerleri, áıelder konsýltasıasy, ambýlatorıalyq hırýrgıa ortalyǵy jáne kúndizgi stasıonar jumys isteıdi. Sonymen qatar turǵyndarǵa medısınalyq ońaltý, stomatologıa, oftalmologıa, otorınolarıngologıa jáne onkologıa baǵyttary boıynsha qyzmet kórsetiledi.
Úshinshi emhana Túrksib aýdanyndaǵy Altaı-1 shaǵynaýdanynda boı kóterip jatyr. Aýmaǵy shamamen 10 myń sharshy metr bolatyn nysan eki aýysymda jumys istep, táýligine myń naýqasqa deıin qabyldaı alady.
Munda jalpy praktıka dárigerleri men tıisti mamandardyń kabınetteri ornalasqan Otbasylyq densaýlyq ortalyǵy jumys isteıdi. Budan bólek, Jastar densaýlyq ortalyǵy, profılaktıka jáne áleýmettik-psıhologıalyq kómek bólimshesi, sondaı-aq kúndizgi stasıonar qarastyrylǵan.
Úsh nysanda da naýqastar sanyn bólý, jeke kireberis, sondaı-aq erekshe qajettiligi bar adamdarǵa arnalǵan jedelsaty men pandýs bolady.
