Almatynyń búdjetin naqtylaý barysynda kólik ınfraqurylymyn damytýǵa jeke baǵyt qarastyrylǵan. Bul týraly máslıhat otyrysynda Almaty qalasy Ekonomıka jáne qarjy basqarmasynyń basshysy Baýyrjan Qudaıbergenov málimdedi.
2026 jyldyń sońyna deıin «Qalqaman» metro beketin paıdalanýǵa berý josparlanyp otyr. Sondaı-aq bıyl «Qalqaman» beketinen «Barlyq» beketine deıingi metro jelisiniń qurylysy bastaldy.
Metro jelisin odan ári keńeıtý úshin «Jibek joly» beketinen áýejaıǵa deıingi ekinshi jeliniń jobalaý-smetalyq qujattamasy ázirlenedi.
Jol ınfraqurylymy salasynda Rysqulov dańǵylyn qala shekarasyna deıin uzartý qurylysy, Muqanov kóshesin Gogol kóshesinen Raıymbek dańǵylyna deıin jáne Raıymbek dańǵylyn Shyǵys aınalma avtomobıl jolyna deıin uzartý jumystary jalǵasady.
Jyl sońyna deıin Aqjar jáne Terekti shaǵynaýdandaryndaǵy jol qurylysyn aıaqtaý josparlanǵan. Sondaı-aq «Batys qaqpa» polıortalyǵynda joldar men ınjenerlik komýnıkasıalardyń qurylysy jalǵasady.
Qoǵamdyq kólikti, onyń ishinde avtobýs tasymaldary men metropolıtendi sýbsıdıalaýǵa da qosymsha qarajat qarastyrylǵan.
Baýyrjan Qudaıbergenovtiń aıtýynsha, búdjetti qazirgi naqtylaý eń aldymen qalanyń basty máselelerin sheshýge jáne bastalǵan jobalardy aıaqtaýǵa baǵyttalǵan.
