Almatynyń búdjeti naqtylanǵan kezde qarajattyń edáýir bóligi áleýmettik ınfraqurylymdy damytýǵa baǵyttalady. Bul týraly máslıhat otyrysynda Almaty qalasy Ekonomıka jáne qarjy basqarmasynyń basshysy Baýyrjan Qudaıbergenov málimdedi.
Áýezov aýdanynda eki mekteptiń qurylysy jalǵasady. 11-shaǵynaýdandaǵy 1 200 oryndyq mektepti jyl sońyna deıin aıaqtap, paıdalanýǵa berý josparlanǵan. Sonymen qatar №158 mekteptiń qazirgi ǵımaratyn buzyp, onyń ornyna 900 oryndyq jańa mektep salý kózdelip otyr. Aqsaı-2 shaǵynaýdanyndaǵy №42 mektepti qaıta jańǵyrtý jumystary da jalǵasady.
Alataý aýdanyndaǵy Daraboz shaǵynaýdanynda 900 oryndyq mektep ashý úshin ǵımarat satyp alý josparlanǵan. Al Almaly aýdanynda bıyl 240 oryndyq balabaqshanyń qurylysy aıaqtalady.
Sondaı-aq, «Keleshek mektepteri» ulttyq jobasy aıasynda bıyl paıdalanýǵa berilgen segiz jańa mekteptiń tolyqqandy jumys isteýine qajetti qarajat qarastyrylǵan. Sonyń nátıjesinde qaladaǵy oqýshy oryndarynyń tapshylyǵyn 11,7 myń orynǵa deıin azaıtý kózdelip otyr.
Densaýlyq saqtaý salasynda Abaı dańǵyly, 69 mekenjaıynda ornalasqan oqý-klınıkalyq ortalyqtyń apatty jaǵdaıdaǵy ǵımaratyn balalardy ońaltý jónindegi qalalyq ortalyqqa beıimdep qaıta jańǵyrtý jumystary bastalady.
Shuǵyla shaǵynaýdanynda bir aýysymda 200 adam qabyldaıtyn dárigerlik ambýlatorıanyń qurylysy jalǵasady. Nysandy jyl sońyna deıin paıdalanýǵa berý josparlanǵan.
Budan bólek, suranysqa ıe medısınalyq mamandyqtar boıynsha 120 rezıdent daıarlaýǵa qarajat qarastyrylǵan.
Sport salasynda Túrksib aýdanyndaǵy dene shynyqtyrý-saýyqtyrý kesheniniń qurylysy jalǵasady.
