Almatyda jergilikti mańyzy bar tarıh jáne mádenıet eskertkishteriniń tizimin keńeıtý josparlanyp otyr, - dep habarlaıdy alnews.
Arnaıy komısıa tarıhı, sáýlettik jáne mádenı qundylyǵy bar turǵyn úıler men qoǵamdyq ǵımarattardy zerdeleýge kiristi. Birinshi kezeńde zertteý úshin 27 nysan irikteldi.
Olardyń qatarynda Satbayev University bas oqý ǵımaraty, ál-Farabı atyndaǵy QazUÝ rektoraty, Ulttyq bank ǵımaraty, Abylaı han dańǵylyndaǵy burynǵy Úkimet úıi, Ortalyq mádenıet jáne demalys saıabaǵynyń arkasy, Ortalyq ámbebap dúkenniń eski ǵımaraty, Chaıkovskıı atyndaǵy Almaty koleji, Geologıa ǵylymdary ınstıtýty, Akýsherlik, gınekologıa jáne perınatologıa ǵylymı ortalyǵy, Kırov atyndaǵy zaýyttyń turǵyn úıleri, Nurǵısa Tilendıev pen Dinmuhamed Qonaevtyń memorıaldyq mýzeıleri, «Atakent» kireberis arkasy jáne Respýblıka alańy bar.
Komısıa osy ǵımarattar men qurylystardyń jaı-kúıin zerttep, qaı nysandy jergilikti mańyzy bar eskertkishter tizimine engizýge usynýǵa bolatynyn anyqtaıdy.
Búginde Almatyda 160 tarıh jáne mádenıet eskertkishi memleket qorǵaýyna alynǵan. Onyń 34-i respýblıkalyq, 126-sy jergilikti mańyzǵa ıe.
Eskertkishterdiń basym bóligi sáýlet jáne qala qurylysy nysandaryna jatady. Olardyń sany – 91. Taǵy 50 nysan monýmentaldy ónerge, 12-si arheologıaǵa qatysty. Bes nysan ansámblder men keshender qataryna kirse, ekeýi kıeli oryn sanalady.
Eskertkishterdiń deni Medeý jáne Almaly aýdandarynda ornalasqan. Atap aıtqanda, Medeý aýdanynda 65, Almaly aýdanynda 50 nysan bar.
Tarıhı ǵımarattar men qurylystardy saqtaý úshin olardyń aınalasynda qurylys júrgizýge shekteý qoıylatyn qorǵaý aımaqtary belgilenedi. Bul talaptar eskertkishterdiń ózin ǵana emes, aınalasyndaǵy tarıhı qurylys nysandaryn da saqtaýǵa múmkindik beredi.
