Almatynyń Medeý aýdanyndaǵy jastar komúnıtı ortalyǵynda ulttyq zıatkerlik oıyn – toǵyzqumalaqtan tegin kýrstardyń ashylý rásimi ótti, - dep habarlaıdy alnews.
Joba qalalyq Jastar saıasaty basqarmasy men «Almaty qalasy Toǵyzqumalaq Federasıasy» qoǵamdyq birlestiginiń birlesýimen qolǵa alynǵan.
Bastama jastar arasynda ulttyq oıyndy keńinen nasıhattaýǵa, olardyń zıatkerlik áleýetin damytýǵa jáne Qazaqstannyń mádenı murasyn saqtaýǵa baǵyttalǵan.
İs-shara aıasynda joba resmı túrde tanystyrylyp, qalanyń jastar komúnıtı ortalyqtarynyń basshylaryna toǵyzqumalaq oıyn jıyntyqtary tabystaldy. Bul jıyntyqtar aldaǵy ýaqytta Almatydaǵy komúnıtı ortalyqtarynda uıymdastyrylatyn tegin sabaqtarda paıdalanylady.
«Almaty qalasy Toǵyzqumalaq Federasıasy» qoǵamdyq birlestiginiń prezıdenti Rýslan Qalıollaev toǵyzqumalaqtyń qazaq halqynyń biregeı zıatkerlik murasy ekenin atap ótti. Onyń aıtýynsha, bul oıyn logıkalyq oılaý qabiletin, strategıalyq kózqarasty jáne taldaý daǵdysyn damytýǵa yqpal etedi.
«Toǵyzqumalaq – jaı ǵana ulttyq oıyn emes, ol halqymyzdyń mádenıeti men zıatkerlik murasynyń ajyramas bóligi. Jastar komúnıtı ortalyqtarynda tegin kýrstardyń ashylýy ózin-ózi damytýǵa umtylatyn árbir jasqa osy oıyndy meńgerýge múmkindik beredi. Bul joba ulttyq oıyndy keńinen dáripteýde mańyzdy qadam bolyp, oǵan qyzyǵýshylyq tanytatyn jastardyń qataryn arttyrady dep senemin», – dedi Rýslan Qalıollaev.
Federasıa ókilderiniń málimetinshe, Almaty qalasy Jastar saıasaty basqarmasymen birlesip, toǵyzqumalaqty buqaralyq zıatkerlik sport túri retinde damytý jumystary aldaǵy ýaqytta da jalǵasady. Josparda turaqty sabaqtar, sheberdiń dáristeri, áýesqoılar týrnırleri jáne jastar arasynda ulttyq qundylyqtar men zıatkerlik demalysty dáripteýge baǵyttalǵan ózge de is-sharalardy ótkizý kózdelgen.
Tegin sabaqtarǵa Almatynyń barlyq nıet bildirgen jastary qatysa alady. Kýrstar qalanyń jastar komúnıtı ortalyqtarynyń bazasynda Toǵyzqumalaq federasıasynyń tájirıbeli nusqaýshylarynyń jetekshiligimen ótedi.
