Almatyda «Jastar qatysatyn búdjet – 2026» jobasy aıasyndaǵy onlaın daýys berý aıaqtaldy, - dep habarlaıdy alnews.
10 myńǵa jýyq daýys jastardyń bilim berý, ekologıa, tehnologıa, áleýmettik qoldaý, densaýlyq saqtaý jáne qalalyq orta baǵyttaryndaǵy úzdik jobalaryn anyqtaýǵa múmkindik berdi.
Jobanyń basty maqsaty – jastardy Almatynyń damýyna qatysty sheshim qabyldaý úderisine belsendi tartý. Jobaǵa ótinim qabyldaý 6 shilde men 2 tamyz aralyǵynda ótti. Osy kezeńde jasalmaty.kz portaly arqyly almatylyq jastardan 203 joba kelip tústi. Tekserý men saraptamalyq baǵalaýdan keıin onyń 122-si, ıaǵnı jalpy bastamalardyń 60,1%-y onlaın daýys berýge jiberildi. Onlaın daýys berý 11-18 tamyz aralyǵynda ótti. Segiz kún ishinde qala turǵyndary usynylǵan jobalarmen tanysyp, ózderi úshin mańyzdy ári qajetti bastamalarǵa qoldaý bildire aldy.
Daýys berý qorytyndysy boıynsha birinshi oryndy Baqytjamal Shadıevanyń INCLUSION LAB – ınklúzıvti bilim berý tájirıbeleri ortalyǵy jobasy ıelendi. Ekinshi orynǵa Áset Madıardyń «Ana akademıasy» jobasy jaıǵasty. Úshinshi oryn Mereke İńirbaevtyń Jasyl Qala – alǵashqy bilim berý sıtı-fermasy jáne durys tamaqtaný zerthanasy jobasyna berildi.
Úzdik jobalardyń qatarynda sıfrlyq tehnologıa men jasandy ıntellekt arqyly oqý mádenıetin damytýǵa baǵyttalǵan KITAP HUB AI, balalardy damytý jáne ońaltý ortalyǵy BabyCare, «Ideıa» jobasy, ınjenerlik-damytýshy QUM TRACK haby, SÄT APP mobıldi qosymshasy, sondaı-aq «Kásipker» jáne «Senim» medıa-jobalary bar.
Osylaısha, turǵyndardan eń kóp qoldaý alǵan bastamalar arasynda ınklúzıvti bilim berý men otbasylardy qoldaýdan bastap, ǵylym, qarjylyq saýattylyq, quqyqtyq mádenıet jáne jastar kásipkerligin damytýǵa deıingi ártúrli baǵyttaǵy jobalar qamtyldy.
«Bul jobanyń basty ereksheligi, jastar qalalyq baǵdarlamalardyń jaı ǵana alýshysy emes, Almaty úshin naqty sheshimderdiń avtory retinde tanylady. Olar máseleni ózderi anyqtap, ony sheshýdiń jolyn usynady, jobasyn ázirleıdi jáne qala qoldaýymen ony júzege asyrý múmkindigine ıe bolady», – dedi joba jetekshisi Samarhan Ábdýǵalıev.
Bir jobany júzege asyrýǵa 500 myńnan 5 mln teńgege deıin qarjy baǵyttalýy múmkin. Bıyl 18-20 jastar jobasyn iske asyrý josparlanǵan. Al aldaǵy ýaqytta qoldaý kórsetiletin bastamalar sanyn jyl saıyn 50 jobaǵa deıin arttyrý kózdelip otyr.
«Jastar qatysatyn búdjet» jastarǵa ıdeıasyn naqty jobaǵa aınaldyryp, ony júzege asyrýǵa múmkindik beretin jáne Almatynyń damýyna tikeleı úles qosýǵa jol ashatyn tıimdi tetikke aınalyp keledi.
