Almatynyń Bilim basqarmasy elimizdiń jetekshi joǵary oqý oryndarymen ózara yntymaqtastyq týraly memorandýmdarǵa qol qoıdy, - dep habarlaıdy alnews.
Yntymaqtastyq ornatylǵan joǵary oqý oryndarynyń qatarynda Abaı atyndaǵy Qazaq ulttyq pedagogıkalyq ýnıversıteti, Qazaq ulttyq qyzdar pedagogıkalyq ýnıversıteti, SDU University, Abylaı han atyndaǵy Qazaq halyqaralyq qatynastar jáne álem tilderi ýnıversıteti jáne De Montfort University bar.
Yntymaqtastyqtyń negizgi maqsaty – Almaty mektepteriniń ózekti qajettilikterin eskere otyryp, pedagog kadrlardy daıarlaýdyń tıimdi júıesin qalyptastyrý, sondaı-aq jas mamandardyń kásibı qalyptasýy men jumysqa ornalasýyna qosymsha múmkindikter jasaý.
Memorandýmdar aıasynda bolashaq pedagogterdi daıarlaý sapasyn arttyrýǵa, stýdentterdiń pedagogıkalyq praktıkadan ótý jáne akademıalyq utqyrlyq múmkindikterin keńeıtýge, túlekterdi qalanyń memlekettik bilim berý uıymdaryna jumysqa ornalastyrýǵa qoldaý kórsetýge erekshe kóńil bólinedi. Sonymen qatar mektep oqýshylarymen birlesken kásibı baǵdar berý jumystaryn júrgizý, ǵylymı-zertteý jáne ádistemelik jobalardy júzege asyrý, pedagogterdiń kásibı quzyretterin arttyrý baǵytynda birlesken jumystar júrgiziledi.
Jańa seriktestik joǵary jáne orta bilim berý júıeleri arasyndaǵy baılanysty nyǵaıtyp, bolashaq muǵalimder úshin «joǵary oqý orny – praktıka – jumysqa ornalasý – kásibı damý» baǵytyndaǵy túsinikti kásibı traektorıany qalyptastyrýǵa múmkindik beredi.
Bul Almaty úshin bilim berý uıymdarynyń jelisi keńeıip, bilim berý ınfraqurylymy jańaryp jatqan qazirgi kezeńde erekshe mańyzdy. Jetekshi joǵary oqý oryndarymen yntymaqtastyq mektepterdi bilikti mamandarmen qamtamasyz etip qana qoımaı, jastar arasynda pedagog mamandyǵynyń tartymdylyǵyn arttyrýǵa da yqpal etedi.
