2026 jyldyń alǵashqy alty aıynda Almatyda 274 demalys kúngi aýyl sharýashylyǵy jármeńkesi uıymdastyrylyp, oǵan 500 myńnan astam qala turǵyny men qonaǵy keldi, - dep habarlaıdy alnews.
Osy kezeńde shamamen 13 myń tonna aýyl sharýashylyǵy ónimi, onyń ishinde áleýmettik mańyzy bar azyq-túlik taýarlary satyldy.
«Almaty» áleýmettik-kásipkerlik korporasıasy uıymdastyratyn jármeńkeler otandyq aýyl sharýashylyǵy taýaryn óndirýshilerge ónimderin deldalsyz, tikeleı jáne qoljetimdi baǵamen satýǵa múmkindik beredi. Satyp alýshylarǵa kókónis, jemis-jıdek, et jáne sút ónimderi, jumyrtqa, bal, nan-toqash jáne kondıterlik ónimder, keptirilgen jemister men basqa da taýarlardyń myńnan astam túri usynylady.
Jármeńkelerge Almaty qalasy, Almaty oblysy jáne elimizdiń ózge óńirlerinen 300-den astam fermerlik sharýashylyq, aýyl sharýashylyǵy taýaryn óndirýshiler men kásipkerler turaqty túrde qatysady. Bul format otandyq óndirýshilerdi qoldaýǵa jáne azyq-túlik baǵasynyń qoljetimdi deńgeıde saqtalýyna yqpal etedi.
Qazirgi ýaqytta demalys kúngi jármeńkeler qalanyń bes aýdanynda – Áýezov, Almaly, Medeý, Bostandyq jáne Jetisý aýdandarynda ótkiziledi.
Sonymen qatar «Almaty» ÁKK saýda alańdaryn jańǵyrtý jumystaryn jalǵastyryp jatyr. Qazirgi kezde Bostandyq aýdanyndaǵy «Qazaqfılm» shaǵynaýdanynda jáne Áýezov aýdanynda jóndeý jumystary júrgizilýde. Osyǵan baılanysty Áýezov aýdanyndaǵy jármeńke ýaqytsha Rysqulbekov kóshesi, 33/2 mekenjaıyna kóshirildi.
Jańǵyrtý jumystary aıasynda aýmaqty kórkeıtý, saýda pavılondaryn jańartý, sanıtarlyq ınfraqurylymdy jaqsartý, ınjenerlik jelilerdi júrgizý jáne nysandardy qoldanystaǵy zańnama talaptary men Almaty qalasynyń dızaın-kodyna sáıkestendirý kózdelgen.
Aldaǵy ýaqytta jármeńke alańdaryn jańǵyrtý jumystary kezeń-kezeńimen qalanyń barlyq segiz aýdanynda qolǵa alynady.
Demalys kúngi jármeńkeler ár senbi jáne jeksenbi kúnderi saǵat 09:00-den 18:00-ge deıin jumys isteıdi.
Jármeńkelerdiń mekenjaılary:
* Bostandyq aýdany – «Qazaqfılm» shaǵynaýdany;
* Áýezov aýdany – Rysqulbekov kóshesi, 33/2;
* Medeý aýdany – Meńdiqulov pen Bekturov kósheleriniń qıylysy;
* Almaly aýdany – Masanchı kóshesi (Áıteke bı men Gogol kósheleriniń aralyǵy);
* Jetisý aýdany – Qulager shaǵynaýdany.
