Jańa oqý jylyna oraı Almatyda 8 jańa jalpy bilim beretin mektep pen qoldanystaǵy mektepterdiń qosymsha korpýstary ashyldy, - dep habarlaıdy alnews.
Jalpy sany 12 065 jańa oqýshy orny quryldy. Bul týraly qalalyq Bilim basqarmasynyń ókilderi aıtty.
Bıyl 32 922 bala alǵash ret mektep tabaldyryǵyn attady. Onyń 30 046-sy memlekettik mektepterge, taǵy 2 876-sy jekemenshik mektepterge qabyldandy.
Qazir Almatyda 362 jalpy bilim beretin mektep jumys isteıdi. Onda 356 myńǵa jýyq bala bilim alady. Ótken oqý jylymen salystyrǵanda oqýshylar sany shamamen 3%-ǵa artty, al memlekettik mektepter sany 10-ǵa kóbeıdi.
Jańa mektepter qosymsha oqýshy ornyna suranys joǵary aýdandarda ashyldy. Alataý aýdanynda 3 750 oryndyq úsh mektep, Túrksib aýdanynda 6 100 oryndyq tórt mektep, Jetisý aýdanynda 1 200 oryndyq bir mektep paıdalanýǵa berildi. №112 jáne №16 mektepter janynan árqaısysy 300 oryndyq qosymsha korpýstar ashyldy.
«Keleshek mektepteri» jobasy aıasynda Almatyda jalpy syıymdylyǵy 34 800 oryn bolatyn 21 mektep paıdalanýǵa berildi.
Sonymen qatar qoldanystaǵy bilim berý ınfraqurylymyn jańartý jumystary jalǵasyp jatyr. №60, №160 jáne №124 mektepterdi qaıta jańǵyrtý aıaqtaldy. №15 mektep-ınternat ta jóndeýden keıin qaıta ashyldy. 164 mektepte aǵymdaǵy jóndeý júrgizildi. Memlekettik bilim berý uıymdarynda hımıa, fızıka, bıologıa, STEM jáne robototehnıka boıynsha 1 130 zamanaýı kabınet jabdyqtaldy.
Áleýmettik qoldaý sharalary da jalǵasyp jatyr. «Mektepke jol» aksıasy aıasynda áleýmettik osal sanattaǵy 7 669 balaǵa mektep formasy men oqý quraldaryn satyp alýǵa 60 myń teńgeden berildi. 133 myń bala tegin ystyq tamaqpen qamtyldy.
Qaladaǵy barlyq mektep ınternet jelisine qosylǵan. 235 mektepte talshyqty-optıkalyq baılanys jelileriniń arqasynda ınternet jyldamdyǵy 100 Mbıt/s-qa jetedi.
Qaýipsizdik pen kólik qoljetimdiligine de erekshe kóńil bólingen. 202 memlekettik balabaqsha men 235 memlekettik mektep keshendi qaýipsizdik júıelerimen tolyq jabdyqtalǵan. «Mektep avtobýsy» jobasy aıasynda 60 mekteptiń 11 myńnan astam oqýshysy tasymalmen qamtylǵan. Bul úshin 250 avtobýs jumyldyryldy.
