Almaty ákimi Darhan Satybaldynyń tóraǵalyǵymen qaladaǵy oqýshy oryndarynyń tapshylyǵyn joıý jáne bilim berý ınfraqurylymyn damytý jónindegi keshendi jospardyń iske asyrylýyna arnalǵan jumys keńesi ótti, - dep habarlaıdy alnews.
2025–2026 oqý jylynyń qorytyndysy boıynsha Almatydaǵy 360 mektepte 357 225 oqýshy bilim aldy. Qazirgi tańda qalada 29 735 oqýshy ornyna qajettilik bar. Ásirese, Áýezov, Alataý jáne Bostandyq aýdandarynda tapshylyq kóptep baıqalady. Júktemeniń artýyna mektep jasyndaǵy balalar sanynyń kóbeıýi jáne ishki kóshi-qon áser etken. Tek byltyrǵy oqý jylynyń ózinde Almaty mektepterine elimizdiń basqa óńirlerinen 17 847 oqýshy aýysyp kelgen. Olardyń jartysyna jýyǵy Almaty oblysynan.
Keńes barysynda qoldanystaǵy tapshylyqty kezeń-kezeńimen azaıtýǵa múmkindik beretin keshendi sharalar qaraldy. Jańa oqý jyly bastalǵanǵa deıin qalada segiz jańa mektep ashylady. Onyń jeteýi «Keleshek mektepteri» ulttyq jobasy aıasynda, bireýi jergilikti búdjet qarajaty esebinen salynǵan mektep. Sonymen qatar qoldanystaǵy úsh mektepke qosymsha ǵımarattardyń qurylysy aıaqtalady. Sonyń nátıjesinde 12 200 jańa oqýshy orny ashylady.
Keńeste mektepke deıingi bilim berý salasyn damytý jaıy da qaraldy. Qazirgi tańda Almatyda 1 098 balabaqsha jumys isteıdi, olarǵa 88 myńnan astam bala barady. Jyl basynan beri shamamen 3 myń oryndyq 33 jańa balabaqsha ashyldy. Jyl sońyna deıin taǵy 23 balabaqsha ashý josparlanǵan. Bul mektepke deıingi bilimmen qamtý deńgeıin 96,6%-ǵa jetkizip, kezekte turǵan balalar sanyn eki myńǵa deıin qysqartýǵa múmkindik beredi.
Keńes sońynda Almaty ákimi jańa bilim berý nysandaryn ýaqytyly paıdalanýǵa berýdi, barlyq jobanyń júzege asyrylýyn kúsheıtýdi jáne shahardaǵy halyq sany qarqyndy ósip jatqan aýdandarda oqýshy oryndarynyń tapshylyǵyn kezeń-kezeńimen joıý úshin qosymsha sharalar qabyldaýdy tapsyrdy.
