Almatyda qala ákimi Darhan Satybaldynyń qatysýymen Qazaqstan Respýblıkasynyń jańa Konstıtýsıasynyń kúshine enýine arnalǵan «Jańa Konstıtýsıa – jańa serpin» atty dóńgelek ústel ótti, - dep habarlaıdy alnews.
İs-sharaǵa ǵylymı jáne sarapshylyq qaýymdastyq ókilderi, shyǵarmashylyq zıaly qaýym, máslıhat depýtattary, Qoǵamdyq keńes músheleri, ardagerler uıymdarynyń jáne memlekettik organdardyń ókilderi qatysty.
Jıyndy ashqan Darhan Satybaldy jańartylǵan Ata zańnyń kúshine enýi Qazaqstannyń zań ústemdigine, ádilettilikke, ashyq memlekettik basqarýǵa jáne joǵary azamattyq jaýapkershilikke negizdelgen jańa damý kezeńine qadam basqanyn bildiretinin aıtty.
Qala ákiminiń aıtýynsha, jańa Konstıtýsıa quqyqtyq normalardy bekitip qana qoımaı, adam quqyǵy men bostandyǵyn qorǵaý, tıimdi memlekettik basqarý qalyptastyrý jáne qoǵamdyq jaýapkershilikti basty qundylyq retinde aıqyndaıtyn memlekettiń jańa damý tujyrymdamasyn qalyptastyrady.
«Memleket basshysy Qasym-Jomart Kemeluly Toqaev atap ótkendeı, jańa Konstıtýsıa elimizdiń uzaq merzimdi damýynyń berik quqyqtyq negizin qalyptastyryp, jańa qoǵamdyq kelisimniń ózegine aınalady. Sondyqtan onyń búgin zańdy kúshine enýi – Ádiletti jáne Progresıvti Qazaqstandy qurý jolyndaǵy reformalardyń jańa kezeńge ótkeniniń aıqyn kórinisi», – dedi Darhan Satybaldy.
Ákim Qazaqstannyń eń iri qalasy, ǵylym, bilim, ınovasıa, mádenıet jáne ekonomıka ortalyǵy sanalatyn Almatyǵa konstıtýsıalyq qaǵıdattardy is júzinde júzege asyrýda erekshe jaýapkershilik júkteletinin jetkizdi. Onyń aıtýynsha, Almatyny 2030 jylǵa deıin damytý strategıasy jańa Konstıtýsıanyń negizgi qaǵıdalarymen úndesip, jaıly, qaýipsiz, ekologıalyq taza ári básekege qabiletti megapolıs qalyptastyrýǵa baǵyttalǵan.
Darhan Satybaldy zamanaýı kólik ınfraqurylymyn damytý, qalany polısentrlik model boıynsha órkendetý, sıfrlandyrý, Almaty AI Park jobasyn qurý, Smart City tehnologıasyn engizý, ekologıalyq jańǵyrtý, qoǵamdyq keńistikterdi damytý jáne «Taza Qazaqstan» bastamasyn iske asyrý turǵyndardyń ómir sapasyn arttyrýǵa baǵyttalǵan konstıtýsıalyq qaǵıdattardyń naqty kórinisi ekenin atap ótti.
Dóńgelek ústel barysynda qatysýshylar jańa Konstıtýsıa qaǵıdattaryn memlekettik basqarý júıesinde tıimdi iske asyrý, quqyqtyq mádenıetti nyǵaıtý, azamattyq jaýapkershilikti arttyrý, sondaı-aq eldiń odan ári damýyna ǵylymı jáne sarapshylyq qaýymdastyqtyń qosar úlesi jóninde pikir almasty.
Kezdesý sońynda qatysýshylar jańa Konstıtýsıa Qazaqstannyń ornyqty damýyna, qoǵamdyq kelisim men zań ústemdigin nyǵaıtýǵa, sonymen birge ádiletti, ashyq ári tıimdi memleket qalyptastyrýǵa berik quqyqtyq negiz bolatynyn erekshe atap ótti.
