Almatyda halyqtyń áleýmettik osal sanattaryna jatatyn azamattardyń jańa bıznes ıdeıasyn júzege asyrýǵa arnalǵan memlekettik granttardy berý baǵdarlamasynyń alǵashqy kezeńi aıaqtaldy, - dep habarlaıdy alnews.
Komısıa sheshimimen 164 azamatqa grant berý maquldandy.
Ótinim bıyl 24 maýsymy men 8 shildesi aralyǵynda qabyldandy. Osy kezeńde barlyǵy 377 ótinim kelip túsken. Komısıa otyrystary 13-21 shilde aralyǵynda ótti.
Memlekettik granttyń kólemi 400 aılyq eseptik kórsetkishke (AEK) deıin, ıaǵnı 1 730 000 teńge. Qarajat kásipkerlik jobalardy bastaýǵa jáne damytýǵa baǵyttalady.
Qoldaý tapqan bıznes jobalardyń qatarynda azyq-túlik ónimderin óndirý, qoǵamdyq tamaqtaný oryndaryn ashý, tigin jáne kıim óndirisi, qolóner buıymdaryn jasaý, avtoservıs, sulýlyq ındýstrıasy, jıhaz óndirý, klınıng jáne turmystyq qyzmet kórsetý, bilim berý, áleýmettik jáne medısınalyq qyzmetter kórsetý, IT jáne sıfrlyq tehnologıa, qurylys pen jóndeý salalary bar.
Grant ıegerleriniń basym bóligi kópbalaly otbasylardyń ókilderi, jalpy sany 103 adam. Sonymen qatar, erekshe qajettiligi bar 28 azamatqa, erekshe qajettiligi bar balalardy tárbıelep otyrǵan 27 azamatqa, sondaı-aq asyraýshysynan aıyrylǵan jáne ataýly áleýmettik kómek alatyn azamattarǵa grant berý maquldandy.
Komısıanyń qabyldaǵan sheshimderi qatysýshylardyń business.enbek.kz portalyndaǵy jeke kabınetterine joldandy.
Grant berý máselesi boıynsha qosymsha aqparatty Almatynyń Eńbek mobıldiligi ortalyǵynan alýǵa bolady.
Mekenjaıy: Almaty qalasy, Dostyq dańǵyly, 85, 2-qabat.
