Almatynyń Medeý aýdanynda Dostyq dańǵylynan Nazarbaev dańǵylyna deıingi Jambyl kóshesinde, sondaı-aq Tóle bı kóshesinde kógaldandyrý jáne zamanaýı avtomatty sýarý júıesin ornatý jumystary aıaqtaldy. Jobalardyń júzege asyrylýy týraly aýdan ákimdigi ókilderi Óńirlik komýnıkasıalar qyzmeti uıymdastyrǵan baspasóz týrynda aıtty.
Atalǵan aýmaqtarda sorǵy stansıalary ornatylyp, 14 shaqyrymnan astam avtomatty sýarý jelisi tartyldy. Jańa júıe jasyl jelekterdi ýaqytyly ári birkelki sýarýǵa múmkindik berip, olardy kútip ustaý tıimdiligin arttyrady jáne sý resýrsyn utymdy paıdalanýdy qamtamasyz etedi.
«Halyq qatysatyn búdjet» baǵdarlamasy aıasynda avtomatty sýarý júıelerin ornatý jáne kógaldandyrý jobalary aıaqtaldy. Jańa sýarý jelileriniń jalpy uzyndyǵy 14 shaqyrymnan asty. Bıyl baǵdarlama aıasynda júzege asyrylyp jatqan 30 jobanyń 10-y kógaldandyrý men avtomatty sýarý júıelerin ornatýǵa baǵyttalǵan. Bul jobalardyń barlyǵy turǵyndardyń bastamasymen júzege asyrylyp, nysandardy irikteý men jobalyq usynystardy ázirleý úderisine turǵyndardyń ózi belsendi qatysty», – dedi Medeý aýdany ákiminiń orynbasary Azat Káketaev.
Onyń aıtýynsha, avtomatty sýarý júıesin engizý aǵash, buta men kógaldardyń jaı-kúıin jaqsartyp, qoǵamdyq keńistikterdi kútip ustaý sapasyn jańa deńgeıge kóterýge múmkindik beredi.
