Almatydaǵy Qazaq memlekettik sırkinde IV Halyqaralyq sırk óneri festıvaliniń saltanatty ashylý rásimi ótti, - dep habarlaıdy alnews.
Bıylǵy festıvál álemniń ár túkpirinen kelgen sırk artıserin, rejıserlerdi, prodúserler men sala sarapshylaryn bir alańǵa jınady. Bul týraly qalalyq Mádenıet basqarmasynyń ókilderi aıtty.
Festıvál halyqaralyq baspasóz konferensıasymen bastaldy. Oǵan qazylar alqasynyń tóraǵasy, Qazaq memlekettik sırkiniń dırektory Maqsat Jaıyqov, qazylar alqasynyń músheleri, Reseı, Tájikstan, Shveısarıa jáne AQSH-tyń sırk uıymdarynyń jetekshileri, sondaı-aq Cirque du Soleil kompanıasynyń kastıng jáne talanttardy irikteý jónindegi dırektory Irına Naýmenko qatysty.
Kezdesý barysynda qatysýshylar zamanaýı sırk óneriniń damý úrdisterin, halyqaralyq áriptestikti nyǵaıtý jáne mádenı baılanysty keńeıtý máselelerin talqylady.
Ashylý saltanatyna arnaıy jańa sahnalyq kostúmder men kórkem beıneler ázirlendi. Bıyl festıvál manejinde alǵash ret Túrkıa, Fransıa jáne Shveısarıanyń artıseri óner kórsetedi.
Baıqaý baǵdarlamasy aıasynda qatysýshylar Gran-prı, sondaı-aq úsh altyn, úsh kúmis jáne úsh qola júldeni sarapqa salady. Halyqaralyq qazylar alqasy artıserdiń kásibı sheberligin, qoıylymdardyń ereksheligi men oryndaý deńgeıin baǵalaıdy.
Saltanatty rásim barysynda alǵash ret osy festıválge arnaıy jazylǵan resmı ánuran shyrqaldy. Resmı bólimnen keıin manejde ártúrli elderdiń artıseri qatysqan baıqaý baǵdarlamasy bastaldy.
1-23 tamyz aralyǵynda Qazaq memlekettik sırkinde festıváldiń jeńimpazdary men júldegerleriniń qatysýymen arnaıy sırk baǵdarlamasy ótedi.
