Almatyda tehnologıalyq bızneske, baǵdarlamalyq ónim ázirleýshilerge, startaptar men zertteýshilerge arnalǵan jańa ınfraqurylym qalyptasyp jatyr, - dep habarlaıdy alnews.
Qalada Almaty AI Hub jáne Almaty AI Park atty eki iri joba júzege asyrylýda.
Eki nysan da bilim berý, ǵylymı zertteýler, startaptardy damytý, tehnologıalyq kompanıalardyń qyzmeti men salalyq is-sharalardy ótkizýdi birtutas ekojúıege biriktirýge baǵyttalǵan.
Kóktem-3 shaǵynaýdanynda Almaty AI Hub ortalyǵy qurylyp jatyr. Aýdany 9,4 myń sharshy metrden asatyn ǵımarat qaıta jańǵyrtylyp, 556 jumys orny bar kópfýnksıonaldy ortalyqqa aınalady. Munda IT jáne jasandy ıntellekt kompanıalaryna, startaptar men ázirleýshilerge arnalǵan keńistikter, bilim berý alańdary, kovorkıngter, keńseler, konferens-zaldar men is-sharalar ótkizý aımaqtary ornalasady.
Hab quramyna jasandy ıntellekt mektebi men AI Campus ınfraqurylymy da kiredi. Sondaı-aq robototehnıka ekojúıesin qurý kózdelgen. Onyń aıasynda demonstrasıalyq aımaqtar, oqytý jáne jańa tehnologıalyq sheshimderdi ázirleýge arnalǵan múmkindikter qarastyrylady. Tehnologıalyq komandalar men kompanıalarǵa keńseler men birlesip jumys isteýge arnalǵan keńistikter usynylady. Al túrli is-sharalardy ótkizý úshin konferens-zaldar men arnaıy alańdar jabdyqtalady.
Osylaısha, Almaty AI Hub bilim alý, alǵashqy jobalardy iske qosý, startaptardy damytý jáne tehnologıalyq kompanıalarda jumys isteý múmkindikterin bir keńistikte biriktiredi.
Ekinshi joba – Almaty AI Park. Ony 4,9 gektar jerge salý josparlanǵan. Keshenniń jalpy aýdany shamamen 76 myń sharshy metr. Joba eki kezeńde júzege asyrylady. Birinshi kezeńdi 2027 jyly jeltoqsanda, al ekinshisin 2028 jyly jeltoqsanda aıaqtaý kózdelgen.
Almaty AI Park quramyna ǵylymı-zertteý jáne jasandy ıntellekt zerthanalary, tehnologıalyq kompanıalardyń keńseleri, kovorkıng, akselerator men bıznes-ınkýbator, sondaı-aq bilim berý jáne is-sharalar ótkizý ınfraqurylymy kiredi. Budan bólek, tehnologıalyq klasterdiń ózinde mamandar daıarlaıtyn ýnıversıtet ashý josparlanǵan.
Jobanyń taǵy bir mańyzdy baǵyty – jas kompanıalardy qoldaý. Startaptar úshin birlesip jumys isteýge, jobalardy tanystyrýǵa jáne ınvestorlar aldynda tanystyrylym ótkizýge arnalǵan arnaıy keńistikter qurylady. Al ǵylymı-zertteý zerthanalary jańa tehnologıalyq sheshimderdi ázirleý men synaqtan ótkizý alańyna aınalady.
Osylaısha, Almaty AI Hub jáne Almaty AI Park jobalary Almatyda IT men jasandy ıntellekt salasyn damytýǵa arnalǵan biryńǵaı ınfraqurylym qalyptastyrýǵa múmkindik beredi. Bul júıe mamandar daıarlaýdan jáne startaptardy iske qosýdan bastap, ǵylymı zertteýler júrgizýge, jańa ónimder jasaýǵa jáne tehnologıalyq bıznesti tartýǵa deıingi barlyq baǵytty qamtıdy.
