Almatyda qazaqstandyq sheberlerdi, kásipkerlerdi jáne halyqaralyq kásibı qaýymdastyq ókilderin biriktirgen eki kúndik qolónershiler jármeńkesi aıaqtaldy, - dep habarlaıdy alnews.
Qatysýshylar ónimderin tanystyryp, jańa satyp alýshylar taýyp, iskerlik baılanys ornatty.
Jármeńke 31 qazan men 1 qarasha aralyǵynda «Atakent» kórme ortalyǵynda ótti. Kelýshiler nazaryna avtorlyq áshekeıler, kıizden, bylǵary men ań terisinen jasalǵan buıymdar, keramıka, ekologıalyq taza oıynshyqtar jáne sándik-qoldanbaly óner týyndylary usynyldy. Baǵdarlama aıasynda sheberdiń sabaqtary ótip, dástúrli qolóner ádisteri kórsetildi.
Eki kún ishinde sheberler týyndylaryn satyp, jańa tutynýshylar tapty. Máselen, zerger Leonıd Shkláev qoldan jasalǵan áshekeılerge suranystyń joǵary bolǵanyn atap ótti. Al batık óneriniń sheberi Irına Gamblevskaıa 20-dan astam buıymyn satty.
İs-sharaǵa túrli elderdiń kásibı qaýymdastyqtaryn biriktiretin Dúnıejúzilik qolóner keńesiniń (World Crafts Council) ókilderi de qatysty. Bul tájirıbe almasýǵa, qazaqstandyq qolóner buıymdaryn shetel naryǵynda ilgeriletýge jáne sheteldik sheberlermen yntymaqtastyqty damytýǵa qosymsha múmkindik berdi.
Jármeńke barysynda otandyq qolónershilerdiń buıymdaryn nasıhattaýǵa jáne jańa satyp alýshylar tabýǵa arnalǵan «Sheber» sıfrlyq platformasy da tanystyryldy.
İs-shara sońynda qatysýshylarǵa qolóner ónerin damytýǵa jáne ulttyq dástúrdi saqtaýǵa qosqan úlesi úshin alǵys hat tabystaldy.
Jármeńke qala ákimdiginiń qoldaýymen Almaty týrızm búrosynyń bastamasymen uıymdastyryldy.
