Almatydaǵy №5 qalalyq klınıkalyq aýrýhanada mamandandyrylǵan stomatologıa bólimshesi ashyldy, - dep habarlaıdy alnews.
Onyń negizgi jumys baǵyttarynyń biri erekshe qajettiligi bar balalardyń tisin jalpy anestezıa arqyly emdeý. Bul týraly qalalyq Qoǵamdyq densaýlyq saqtaý basqarmasynyń ókilderi habarlady.
Damý ereksheligi bar nemese tis dárigerinen qatty qorqatyn balalar úshin stomatologıalyq em qabyldaý ońaıǵa soqpaıdy. Keıbir jaǵdaıda olardyń medısınalyq prosedýralarǵa tózýi qıyn bolýy múmkin. Osyndaı pasıentterge qajetti emdi jalpy anestezıa arqyly, dárigerlerdiń turaqty baqylaýymen júrgizý qarastyrylǵan.
Bólimshe qajetti medısınalyq qural-jabdyqtarmen tolyq jabdyqtalǵan. Munda eresekter men balalardy qabyldaýǵa arnalǵan kabınetter, anestezıologtyń jumys orny jáne anestezıadan keıin naýqastyń oıanýyna arnalǵan palata bar. Emshara aldynda pasıentter medısınalyq tekserýden ótedi. Al anestezıany qoldaný múmkindigi ár naýqastyń densaýlyq jaǵdaıy men medısınalyq kórsetilimderine qaraı jeke anyqtalady.
Bólimshede tis emdeýmen qatar aýyz qýysyn keshendi saýyqtyrý jumystary júrgiziledi. Qajet bolǵan jaǵdaıda birneshe stomatologıalyq prosedýrany bir seansta oryndaýǵa bolady. Bul pasıentterdiń aýrýhanaǵa qaıta-qaıta kelýin azaıtyp, emdeý úderisin jeńildetýge múmkindik beredi.
Bólimshe ashylǵannan beri 100-den astam pasıent jalpy anestezıamen stomatologıalyq em alǵan. Budan bólek, medısınalyq mekemede kún saıyn josparly jáne shuǵyl kómek kórsetiledi. Mamandar táýligine orta eseppen tisiniń qatty aýyrsynýyna shaǵymdanǵan 10-ǵa jýyq adamdy qabyldaıdy.
Jańa bólimshe Almatyda mamandandyrylǵan stomatologıalyq kómektiń qoljetimdiligin arttyrýǵa múmkindik beredi. Basqarma ókilderiniń aıtýynsha, medısına qyzmetkerleriniń basty maqsaty – árbir naýqastyń jeke qajettiligin eskere otyryp, qoljetimdi ári medısınalyq qyzmet kórsetý.
