Almatyda Qalalyq perınataldyq ortalyqtyń bazasynda qaýip tobyndaǵy júkti áıelderge arnalǵan klınıkalyq-dıagnostıkalyq ortalyq jumysyn bastady, - dep habarlaıdy alnews.
Munda júktiligi asqynǵan, qosymsha aýrýlary bar jáne akýsherlik asqynýlar qaýpi joǵary áıelder ambýlatorıalyq jaǵdaıda qajetti tekserýen ótip, mamandardyń keńesin ala alady. Bul týraly Almaty qalasy Qoǵamdyq densaýlyq saqtaý basqarmasynyń ókilderi habarlady.
Klınıkalyq-dıagnostıkalyq ortalyqqa júkti áıel tirkelgen emhanasynyń joldamasymen keledi. Medısınalyq kómek MÁMS aıasynda tegin kórsetiledi.
Jańa ortalyqtyń ashylýyna Almaty qalasy Qoǵamdyq densaýlyq saqtaý basqarmasynyń basshysy Marat Pashımov qatysty.
«Jańa ortalyq qaýip tobyndaǵy júkti áıelderge mamandandyrylǵan kómekti ambýlatorıalyq kezeńnen bastap qoljetimdi etýge múmkindik beredi. Yqtımal asqynýlardy der kezinde anyqtap, ana men balanyń jaǵdaıyn turaqty baqylaý jáne qajet bolǵan jaǵdaıda jedel sheshim qabyldaý mańyzdy. Bul júkti áıelderge kórsetiletin medısınalyq kómektiń sapasy men qaýipsizdigin arttyrý jolyndaǵy taǵy bir qadam», – dedi Marat Pashımov.
Qalalyq perınataldyq ortalyq – Almatydaǵy úshinshi deńgeıli akýsherlik kómek kórsetetin iri medısınalyq uıymdardyń biri. Munda jyl saıyn 9-10 myńǵa jýyq áıel bosanady. Ortalyq mamandary júktiligi asqynǵan áıelderge medısınalyq kómek kórsetip, dene salmaǵy óte tómen bolyp týǵan nárestelerge kútim jasaıdy.
Jańa ortalyq zamanaýı medısınalyq jabdyqtarmen qamtylǵan. Munda MRT, saraptamalyq deńgeıdegi ÝDZ, kolposkopıa jáne KTG apparattary bar. Sonymen qatar zerthanalyq qyzmet kórsetiledi. Almaty qalasy ákimdigi men Qoǵamdyq densaýlyq saqtaý basqarmasynyń qoldaýymen bıyl kompúterlik tomograf ornatý josparlanyp otyr.
Júkti áıelderdi akýsher-gınekologtarmen qatar genetık, terapevt, oftalmolog jáne nevrolog qabyldaıdy. Osylaısha bolashaq analar birneshe mamannyń keńesin alyp, qajetti tekserýlerden bir jerde óte alady.
Ortalyqtyń jumysy qaýip tobyndaǵy júkti áıelderdi baqylaýdy kúsheıtip, yqtımal asqynýlardy erte anyqtaýǵa jáne qajetti medısınalyq kómekti ambýlatorıalyq kezeńde der kezinde kórsetýge múmkindik beredi.
Bul Almatyda qaýip tobyndaǵy júkti áıelderge arnalǵan ekinshi klınıkalyq-dıagnostıkalyq ortalyq. Alǵashqysy buǵan deıin Perınatologıa jáne balalar kardıohırýrgıasy ortalyǵynyń bazasynda ashylǵan.
