Almatyda 10 qazanda «Taza Qazaqstan» respýblıkalyq ekologıalyq baǵdarlamasy aıasynda jalpyqalalyq senbilik ótti, - dep habarlaıdy alnews.
Qala aýmaqtaryn tazalaý jáne kógaldandyrý jumystaryna 3 480 adam qatysty. Bul týraly qalanyń Komýnaldyq ınfraqurylym jáne turǵyn úı ınspeksıasy basqarmasynyń ókilderi aıtty.
Ekologıalyq aksıa qalanyń barlyq segiz aýdanyn qamtydy. Jumys skverlerdi, kóshelerdi, jasyl aımaqtar men jaǵalaý aýmaǵyn qosa alǵanda, 10 ýchaskede júrgizildi.
Senbilikke qatysýshylar Baým toǵaıyn, «Bıokombınat» jáne Ratýshnyı skverlerin, Saıaly men Kókshoqy shaǵynaýdandarynyń aýmaqtaryn, sondaı-aq Qarǵaly ózeniniń boıyndaǵy jáne birqatar qala kóshelerindegi ýchaskelerdi retke keltirdi.
İs-shara qorytyndysy boıynsha 506 tekshe metr qoqys pen qaldyq jınalyp, shyǵaryldy. Tazalaý jumystaryna 79 arnaıy tehnıka jumyldyryldy.
Qala aýmaqtaryn kógaldandyrýǵa erekshe nazar aýdaryldy. Senbilik barysynda 1 220 aǵash egildi. Onyń ishinde bıiktigi alty metrden asatyn iri jóke men úıeńki aǵashtary, sondaı-aq sánaǵash, shaǵan jáne shyrsha kóshetteri bar. Aǵash egý jumystary Alataý, Áýezov jáne Naýryzbaı aýdandarynda júrgizildi.
«Taza Qazaqstan» baǵdarlamasy aıasyndaǵy jalpyqalalyq senbilik qalanyń tazalyǵyn saqtaýǵa, qoǵamdyq keńistikterdi kórkeıtýge jáne Almaty turǵyndarynyń ekologıalyq mádenıetin qalyptastyrýǵa baǵyttalǵan.
