2025 jylǵy 15 jeltoqsanda Almaty qalasynda Qazaqstan Respýblıkasy Táýelsizdik kúnine oraı Medeý aýdanynda birden eki bilim berý mekemesiniń tehnıkalyq ashylýy ótti. Oqý-tárbıe prosesin bastaýǵa tolyq daıyn ekenin №195 jańa balabaqsha jáne qaıta jańǵyrtýdan ótken №99 jalpy bilim beretin mektep kórsetti, - dep habarlaıdy alnews.
№195 balabaqshanyń aýmaǵy tolyq abattandyrylǵan: ǵımarattyń aınalasyna asfált tóselip, qaraǵaı, sheten, sıren, jımolost kúmis jıde, kógal shóbi otyrǵyzylǵan, kızılnıkten jasalǵan tiri qorshaý bar. Balalar úshin rezeńke jabyndysy bar jaıly besedkalar, shaǵyn sáýlettik formalary (MAF) bar oıyn alańdary salynǵan.
Aýmaǵy 1 950 sharshy metrdi quraıtyn eki qabatty balabaqsha 2 jastan 6 jasqa deıingi balalardy mektepke deıingi tárbıemen qamtýǵa arnalǵan, syıymdylyǵy – 140 oryn, oqytý tili – qazaq tili.
Eki qabatta ártúrli jas toptaryna arnalǵan toptyq bólimder ornalasqan. Ár toptyń janynda kıim sheshetin bólme, jatyn bólme, býfet jáne sanıtarlyq torap qarastyrylǵan. Qosymsha sabaqtar mýzykalyq zalda ótkiziledi.
Erekshe bilim berý qajettilikteri bar balalar úshin negizgi kireberiste pandýstar ornatylǵan, arnaıy tutqalarmen jabdyqtalǵan sanıtarlyq torap bar. Balalardyń júrip-turý aımaqtary taktıldi jolaqtarmen, al qozǵalys baǵyttary arnaıy quraldarmen jabdyqtalǵan.
Balabaqshada psıholog, logoped kabınetteri jáne ádistemelik kabınet bar. As blogy júkteý aımaǵy men as kótergishi bar jeke kireberispen qamtamasyz etilgen. Sondaı-aq medısınalyq blokta tambýr, qabyldaý bólmesi, dáriger kabıneti, emshara, fızıoterapıa kabıneti jáne sanıtarlyq torap ornalasqan.
Osy kúni 1963 jyly salynǵan №99 mekteptiń de tehnıkalyq ashylýy ótti. Atalǵan bilim ordasynda sońǵy kúrdeli jóndeý 20 jyl buryn júrgizilgen. Ótken jyly aýqymdy qaıta jańǵyrtý jáne bastaýysh synyp oqýshylaryna arnalǵan, 250 balaǵa eseptelgen 3 qabatty qosymsha ǵımarat salý týraly sheshim qabyldanǵan.
Qazirgi ýaqytta mektep aýmaǵy tolyq abattandyrylyp, týıa men qaıyń kóshetteri otyrǵyzylǵan. Oqýshylar úshin sport stadıony salynǵan.
Mektep ǵımaraty 520 orynǵa eseptelgen. Qosymsha sabaqtar mýzykalyq aspaptarmen tolyq jabdyqtalǵan mýzyka kabınetinde ótedi. Onda dombyra, daýylpaz, asataıaq, tuıaqtas, shańqobyz, pıanıno, baıan, kastanet, ksılofon, marakas syndy aspaptar bar.
Mektepte hımıa, fızıka, bıologıa kabınetteri, sport zaly, kórkem eńbek kabıneti (uldar men qyzdarǵa arnalǵan) jáne 100 oryndyq akt zaly jumys isteıdi.
Balalardyń qaýipsizdigine de erekshe kóńil bólingen: órt qaýipsizdigi júıesi engizilip, arnaıy habarlaý dachıkteri ornatylǵan, ǵımaratta seısmıkalyq kúsheıtý jumystary júrgizilgen. Jertóle bóliginde sý ólsheý jáne jylý toraptary, jeldetý kamerasy men elektr qalqany ornalasqan.
