Almatyda 22 qazanda aty ańyzǵa aınalǵan qazaqstandyq «Dos-Muqasan» tobyna arnalǵan art-ınstallásıa saltanatty túrde ashylady, - dep habarlaıdy alnews.
Jańa art-nysan Abaı dańǵyly men Sátbaev kóshesiniń arasyndaǵy jańartylǵan Masanchı kóshesinde ornatyldy. Bul týraly qalalyq Qoǵamdyq keńistikterdi damytý basqarmasynyń ókilderi habarlady.
Installásıa áıgili mýzykalyq ujym músheleriniń jıyntyq kórkem beınesin sıpattaıdy. Kompozısıa metaldan avtorlyq erekshe tehnıkamen jasalǵan. Qurylymnyń bıiktigi – 1,8 metr, eni – 3,5 metr.
Art-nysannyń basty ereksheligi – ınteraktıvti aýdıojúıe. Arnaıy batyrmany basý arqyly kez kelgen adam «Dos-Muqasan» tobynyń tanymal ánderin tyńdaı alady. Osylaısha, ınstallásıa qala keńistigin kórkemdeıtin nysan ǵana emes, ashyq aspan astyndaǵy ózindik mýzykalyq alańǵa aınalady.
Installásıa ornatylatyn oryn mýzykalyq ujymnyń Almatymen tyǵyz baılanysty tarıhy eskerile otyryp tańdalǵan. 1967 jyly Qazaq polıtehnıkalyq ınstıtýtynyń stýdentteri Dosym Súleev, Murat Qusaıynov, Qamıt Sanbaev jáne Aleksandr Lıtvınov vokaldy-aspaptyq ansámbl qurdy. Keıin bul ujym Qazaqstandaǵy eń tanymal mýzykalyq toptardyń birine aınaldy.
Installásıany ornatý Masanchı kóshesin kórkeıtý tujyrymdamasy aıasynda qarastyrylǵan. Munda qala mádenıeti men shyǵarmashylyǵyna basymdyq berilgen gastronomıalyq keńistik qalyptasyp jatyr. Jańa art-nysan jańartylǵan kósheniń kórikti oryndarynyń birine aınalyp, otandyq mýzyka tarıhy men onyń Almatymen baılanysyn eske salady.
Art-ınstallásıanyń ashylý rásimi 22 qazanda saǵat 14:00-de ótedi. İs-shara barysynda qurmetti qonaqtar sóz sóılep, art-nysan resmı túrde ashylady, mýzykalyq baǵdarlama da josparlanǵan. «Dos-Muqasan» tobynyń tanymal ánderin Satbayev University stýdenttik fılarmonıasynyń Meir BAND ansambli oryndaıdy.
