Almaty qalasy Mádenıet basqarmasy qalamyzdyń ómirin zamanaýı shyǵarmashylyq formatta tanytatyn talantty avtorlardy anyqtaý jáne qoldaý maqsatynda «Aspan taýly Almaty!» respýblıkalyq beınekontent baıqaýyn jarıalaıdy, - dep habarlaıdy alnews.
Baıqaý Almatynyń ózindik tarıhyn, bolmysyn, búgingi tynysyn, mádenıetin, sáýletin jáne tabıǵatyn beınekontent arqyly kórsetýge jáne dáripteýge baǵyttalǵan. Baıqaýǵa qatysýshylar ásem qalanyń kópshilikke tanys qyrlarymen qatar, kúndelikti ómirden baıqala bermeıtin erekshelikterin de óz shyǵarmashylyq kózqarasy arqyly usynyp, doda jeńimpazyna aınalý múmkindigine ıe bolady.
Baıqaýǵa Qazaqstan Respýblıkasynyń 18 jasqa tolǵan azamattary qatysa alady. Qatysýshylardyń turǵylyqty jerine, kásibı mamandyǵyna nemese qyzmet salasyna shekteý qoıylmaıdy. Usynylatyn materıaldar qatysýshynyń óz avtorlyq jumysy bolýy, baıqaý bastalǵanǵa deıin basqa baıqaýlarda júldeli oryndarǵa ıe bolmaýy, sonymen qatar buryn áleýmettik jeliler men beınehostıngterge júktelmegen bolýy qajet. Beınekontent uzaqtyǵy – 30 sekýndtan 2 mınýtqa deıin.
Baıqaýǵa qatysý úshin ótinim men beınematerıaldardy aspantaulyalmaty@gmail.com elektrondy mekenjaıyna jiberý kerek.
Qatysýǵa kelip túsken jumystardy shyǵarmashylyq ındýstrıa, medıa jáne mádenıet salasynyń mamandarynan quralǵan saraptamalyq komısıa men qazylar alqasy baǵalaıdy. Qazylar quramyna rejıserler, prodúserler, mádenıet jáne óner qaıratkerleri, medıa salasynyń kásibı mamandary, qoǵam jáne buqaralyq aqparat quraldarynyń ókilderi kiredi.
Jumystardy baǵalaý kezinde eń aldymen avtorlyq ıdeıanyń ózindik ereksheligine, taqyrypty ashý tásiline jáne beınematerıaldyń kórkemdik sheshimine nazar aýdarylady. Sonymen qatar jumystyń mazmundyq tereńdigi, vızýaldy tili, rejıserlik jáne montajdyq sheshimderi, tehnıkalyq sapasy, sondaı-aq kórermenge emosıonaldyq áseri eskeriledi.
Baıqaý jeńimpazdary 2026 jylǵy qyrkúıekte Almaty qalasy kúnine arnalǵan is-shara aıasynda jarıalanyp, marapattalady.
Baıqaýdyń jalpy júlde qory 7,5 mln teńgeni quraıdy:
* İ oryn – 3 000 000 teńge;
* İİ oryn – 2 000 000 teńge;
* İİİ oryn – 1 000 000 teńge;
* bes yntalandyrý syılyǵy – 300 000 teńgeden.
Baıqaý qorytyndysy boıynsha úzdik dep tanylǵan beınematerıaldar arnaıy iriktelip, uıymdastyrýshylardyń aqparattyq jáne komýnıkasıalyq alańdarynda jarıalanady. Jeńimpazdar men júldegerler Almaty qalasy kúnine arnalǵan saltanatty marapattaý rásimine shaqyrylady.
«Aspan taýly Almaty!» baıqaýy qalany jańa qyrynan kórsetetin avtorlyq jumystardyń paıda bolýyna múmkindik berip, qazaqstandyq beınekontenttiń damýyna úles qosýdy kózdeıdi. Joba arqyly jas avtorlar men tájirıbeli shyǵarmashylyq mamandardyń ózara tájirıbe almasýyna, jańa ıdeıalardyń qalyptasýyna jáne Almatynyń mádenı ári qalalyq bolmysyn zamanaýı vızýaldy formatta tanytýǵa jol ashylady.
Baıqaýǵa qatysý úshin tolyq aqparatty tómendegi silteme boıynsha bile alasyzdar:
https://www.gov.kz/memleket/entities/almaty-madeniet/documents/details/1056278?lang=kk
