Almatyda ákimshilik quqyq buzýshylyq jasaǵany úshin ustalyp, komýnaldyq arnaıy turaqqa jetkizilgen kólikterdi evakýasıalaý jáne saqtaý úshin aqy engiziledi, - dep habarlaıdy alnews.
Jańa tártip 4 qazannan bastap kúshine enedi. Bul týraly Almaty qalasynyń Jol qozǵalysy jáne jolaýshylar kóligin uıymdastyrý basqarmasynyń ókilderi aıtty.
4 qazannan bastap kólik quraldaryn komýnaldyq arnaıy turaqtarǵa evakýasıalaý jáne ýaqytsha saqtaý úshin tólemniń biryńǵaı tártibi qoldanylady. Tólem mólsheri 2026 jyly 18 qyrkúıekte Almaty qalasy máslıhatynyń kezekten tys sesıasynda bekitildi.
Evakýasıa quny kóliktiń barlyq sanaty úshin 3 AEK, ıaǵnı 12 975 teńge bolady. Jeńil avtokólikti arnaıy turaqta saqtaý quny alǵashqy táýlikke 2,5 AEK (10 812,5 teńge), keıingi ár táýlikke 5 AEK (21 625 teńge) mólsherinde belgilendi.
Kólik ıelerine quqyq buzýshylyqtardy joıyp, avtokólikterin 3 qazanǵa deıin arnaıy turaqtan alyp ketý usynylady.
Aıta keteıik, bul ózgeris barlyq evakýasıa jaǵdaıyna qatysty emes. Ol Qazaqstan Respýblıkasynyń Ákimshilik quqyq buzýshylyq týraly kodekste kózdelgen jaǵdaıda ustalyp, arnaıy turaqqa jetkizilgen kólik quraldaryna ǵana qoldanylady.
