Almaty qalasy Qoǵamdyq densaýlyq saqtaý basqarmasynyń málimetinshe, aptap ystyq kezeńinde qalada shuǵyl medısınalyq kómekke júginýshiler sany kóbeıgen, - dep habarlaıdy alnews.
Dárigerlerdiń aıtýynsha, joǵary temperatýra ásirese qart adamdar, balalar, júkti áıelder jáne sozylmaly aýrýy bar naýqastar úshin asa qaýipti.
Almaty qalalyq Jedel medısınalyq járdem qyzmeti dırektorynyń mindetin atqarýshy orynbasary Azamat Qurmanbekovtiń aıtýynsha, ystyq kúnderi júrek-qan tamyrlary júıesine túsetin júkteme aıtarlyqtaı artady. Aýa temperatýrasynyń joǵary bolýy qan qysymynyń kúrt kóterilýine, júrek yrǵaǵynyń buzylýyna, entigýge, sondaı-aq mıokard ınfarkti men ınsýlt qaýpiniń artýyna sebep bolýy múmkin.
Tek shilde aıynyń alǵashqy eki aptasynda jedel járdem qyzmetine 33,6 myńnan astam shaqyrtý túsken. Onyń ishinde shamamen 1,5 myńy arterıalyq qysymnyń joǵarylaýyna baılanysty bolsa, taǵy 300-den astamy júrek-qan tamyrlary aýrýlaryna, sonyń ishinde júrektiń ıshemıalyq aýrýy men jedel mıokard ınfarktine qatysty bolǵan. Budan bólek, mı qan aınalymynyń jedel buzylysyna ushyraǵan 50-ge jýyq naýqas shuǵyl túrde qalalyq aýrýhanalarǵa jetkizilgen.
Aldyńǵy kezeńmen salystyrǵanda, kún ótý saldarynan jedel járdem shaqyrýdy qajet etken jaǵdaılar eki ese kóbeıgen.
Basqarma mamandarynyń aıtýynsha, aptap ystyq aǵzanyń sýsyzdaný qaýpin, taǵamnan ýlaný, ishek ınfeksıalarynyń taralý yqtımaldyǵyn arttyryp, maýsymdyq alergıa belgilerin kúsheıtedi. Sondyqtan sozylmaly aýrýy bar azamattarǵa densaýlyǵyna erekshe kóńil bólý kerek. Olar dárigerdiń nusqaýlaryn qatań saqtap, dári-dármekterin ýaqytyly qabyldap, qan qysymy men qandaǵy qant deńgeıin turaqty baqylap, qyzyp ketýden saqtanyp, josparly medısınalyq tekserýdi ótkizip almaýy qajet.
Almaty qalasynyń emhanalary sozylmaly aýrýy bar naýqastardy dıspanserlik baqylaýdy jalǵastyryp, olardy qajetti dári-dármekpen qamtamasyz etip, densaýlyq jaǵdaıyna turaqty monıtorıń júrgizýde. Eger adamnyń jaǵdaıy nasharlasa, asqynýdy kútpeı, ýaqytyly ýchaskelik dárigerge qaralǵan jón.
Dárigerler múmkindiginshe saǵat 11:00-den 17:00-ge deıin kúnniń tikeleı sáýlesinde júrmeýge, tabıǵı matadan tigilgen jeńil kıim, bas kıim jáne kúnnen qorǵaıtyn kózildirik kıýge keńes beredi.
Sondaı-aq, suıyqtyqty jetkilikti mólsherde ishý óte mańyzdy. Medısınalyq qarsy kórsetilim bolmasa, eresekterge táýligine keminde 2 lıtr sý ishý usynylady. Sonymen qatar alkogóldi ishimdikterdi, tátti gazdalǵan sýsyndardy jáne kofeni shamadan tys tutynýdy shekteý qajet.
Eger adamnyń basy qatty aýyryp, basy aınalsa, álsizdik, júrek aıný, sananyń shatasýy, dene qyzýynyń kóterilýi nemese esinen taný belgileri baıqalsa, ony dereý salqyn jerge aparyp, denesin salqyndatý sharalaryn jasap, az-azdan sý berip, jedel medısınalyq járdem shaqyrý qajet.
Almaty qalasy Qoǵamdyq densaýlyq saqtaý basqarmasy qarapaıym saqtyq sharalaryn saqtaý jáne ýaqytyly medısınalyq kómekke júginý aptap ystyq kezinde densaýlyqqa tónetin qaýip-qaterdi azaıtýǵa kómektesetinin eske salady.
