Almatyda qala ákimdiginiń qoldaýymen mýzyka jáne kreatıvti ındýstrıany damytýǵa arnalǵan jańa kópfýnksıonaldy Almaty Studios keńistigi ashylady, - dep habarlaıdy alnews.
Jobanyń bastamashysy – mýzykant, kompozıtor, A’STUDIO tobynyń jetekshisi Baıǵalı Serkebaev. Bul týraly Almaty qalasy Týrızm basqarmasynyń ókilderi aıtty.
Munda mýzyka úırenýge, daıyndyq ótkizýge, mýzykalyq shyǵarmalardy jazýǵa, túsirilim men konsert uıymdastyrýǵa jaǵdaı jasalady. Keńistik óner jolyn endi bastaǵan mýzykanttarǵa da, kásibı oryndaýshylarǵa da arnalǵan.
Qalanyń taýly bóliginde, ózen jaǵasynda ornalasqan keshende dybys jazý stýdıasy, daıyndyq zaly, oqý synyptary, túsirilim pavılony jáne 100 adamǵa arnalǵan shaǵyn konsert zaly bar. Munda sheberdiń dáristerin, shyǵarmashylyq kezdesýler men jańa mýzykalyq jobalardyń tanystyrylymdaryn ótkizý de josparlanǵan.
«Men úshin Almaty Studios jas jáne tájirıbeli mýzykanttar kezdesip, ózara tájirıbe almasatyn, pikirles adamdardy tabatyn jáne shyǵarmashylyq ıdeıasyn júzege asyratyn ortaǵa aınalǵany mańyzdy», – dedi Baıǵalı Serkebaev.
Joba uıymdastyrýshylarynyń aıtýynsha, keshen jergilikti mýzykanttardyń shyǵarmashylyq jumysyna jáne birlesken jobalardy iske asyrýǵa paıdalanylmaq. Sonymen qatar munda mádenı jáne oqıǵalyq týrızmdi damytýǵa baǵyttalǵan is-sharalar ótkizý kózdelgen.
