Almatyda 2026 jyldyń basynan beri qalanyń áleýmettik, turǵyn úı jáne ınjenerlik ınfraqurylymyn damytý jumystary jalǵasýda. Birinshi jartyjyldyqta bilim berý, densaýlyq saqtaý, turǵyn úı qurylysy, sondaı-aq kúrdeli jóndeý jáne seısmıkalyq kúsheıtý baǵyttaryn qamtıtyn 10 áleýmettik mańyzy bar nysannyń qurylysy aıaqtalyp, paıdalanýǵa berildi. Bul týraly Almaty qalasynyń Qurylys basqarmasynyń ókilderi aıtty.
Jańa nysandardyń basym bóligi bilim berý salasyna tıesili. Atap aıtqanda, Zerdeli shaǵynaýdanynda 550 oryndyq mektep, Shuǵyla shaǵynaýdanynda 340 oryndyq mektep pen jataqhana, Quramys, Jas Qanat jáne Qalqaman shaǵynaýdandarynda jalpy syıymdylyǵy 820 oryndyq úsh balabaqsha, sondaı-aq Saıaly shaǵynaýdanynda Damý jáne shyǵarmashylyq ortalyǵy paıdalanýǵa berildi.
Sonymen qatar, №10 bóbekjaı-balabaqsha qaıta jańǵyrtylyp, Bostandyq aýdanyndaǵy Orbıta-4 shaǵynaýdanynda ornalasqan bóbekjaı-balabaqsha ǵımaraty seısmıkalyq turǵydan kúsheıtildi.
Densaýlyq saqtaý salasynda Medeý aýdanynda jedel medısınalyq járdem qosalqy stansasy paıdalanýǵa berildi. Sondaı-aq, Almaly aýdanyndaǵy Abylaı han kóshesinde ornalasqan Memlekettik kirister departamenti ǵımaraty qaıta jańǵyrtýdan ótti.
Turǵyn úı qurylysy aıasynda Qalqaman-2 shaǵynaýdanyndaǵy halyqqa qyzmet kórsetý nysandary bar kóppáterli turǵyn úılerdiń alǵashqy kezeńi aıaqtaldy.
Almaty qalasy Qurylys basqarmasy ókilderiniń málimetinshe, atalǵan jobalardy júzege asyrý bilim berý, densaýlyq saqtaý jáne mektepke deıingi tárbıe berý nysandarymen qamtylý deńgeıin arttyrýǵa, jańa oqýshy jáne mektepke deıingi oryndar ashýǵa, sondaı-aq, qalanyń áleýmettik ınfraqurylymynyń qaýipsizdigin kúsheıtýge múmkindik berdi.
