Búgin Almatynyń Jetisý aýdanyndaǵy «Adem» saýda ortalyǵynda qalalyq kitaphanalardyń kitap berý pýnkti ashyldy, - dep habarlaıdy alnews.
Joba Memleket basshysy Qasym-Jomart Toqaevtyń «Oqıtyn ult» jobasy aıasynda qala ákimi Darhan Satybaldynyń tapsyrmasymen júzege asyrylyp otyr. Jobanyń negizgi maqsaty – qala turǵyndary úshin kitaptyń qoljetimdiligin arttyrý, kitap oqýǵa qyzyǵýshylyq qalyptastyrý jáne oqý mádenıetin damytý.
İs-sharaǵa belgili jazýshy Nurdáýlet Aqysh, aqyn Baqyt Bedelhan, aıtysker aqyn Serik Qalı, aqyn Murathan Shoqan, Jetisý aýdany ákiminiń orynbasary Janasyl Sabyruly, mádenıet salasynyń ókilderi men qala turǵyndary qatysty.
Jańa nysandy Jetisý aýdany ákiminiń orynbasary Janasyl Sabyruly men jazýshy Nurdáýlet Aqysh saltanatty túrde ashty. Bastamany qoldaǵan qalamgerler kitaptaryn syıǵa tartyp, jańa kitap berý pýnktiniń qoryn qundy týyndylarmen tolyqtyrdy.
Almaty kitaphanalarynyń №14 fılıalynyń meńgerýshisi Zarına Aıdosqyzy bul bastamanyń turǵyndar úshin kitaphana qyzmetiniń qoljetimdiligin arttyrýdaǵy rólin atap ótti.
«Jańa kitap berý pýnktiniń ashylýy – qoljetimdi kitaphana ortasyn damytýdaǵy mańyzdy qadam. Mundaı keńistikter kitaphana qyzmetiniń dástúrli format aıasynan shyǵyp, qala turǵyndarynyń kúndelikti ómiriniń bir bóligine aınalýyna múmkindik beredi. Jańa pýnkt kitap oqýǵa qyzyǵýshylyqty arttyrýǵa, oqý mádenıetin damytýǵa jáne «Oqıtyn ult» qalyptastyrýǵa yqpal etip, turǵyndar jıi keletin oryndardyń birine aınalady dep senemin», – dedi Zarına Aıdosqyzy.
Kitap berý pýnktiniń ashylýyn saýda ortalyǵynyń kásipkerleri de oń baǵalady. Kásipker Zalınanyń aıtýynsha, mundaı bastama kitapty turǵyndardyń kúndelikti ómiriniń bir bóligine aınaldyrýǵa múmkindik beredi.
«Biz úshin dál osy saýda ortalyǵynda kitap berý pýnktiniń ashylýy jaǵymdy jańalyq boldy. Kúndelikti tirshilikte kitaphanaǵa arnaıy baryp, kitap alýǵa árdaıym múmkindik bola bermeıdi. Endi jumys ornynan alysqa barmaı-aq, bos ýaqytta osynda kelip, qajetti kitapty alýǵa bolady. Meniń oıymsha, bul osynda jumys isteıtin kásipkerler men qyzmetkerler úshin ǵana emes, saýda ortalyǵyna kelýshiler úshin de jaqsy múmkindik. Kitaptardyń qoljetimdi bola túsip, osyndaı oryndarda usynylǵany qýantady», – dedi ol.
«Adem» saýda ortalyǵynyń kásipkerleri men kelýshileri alǵashqy kúnderden-aq «Oqıtyn ult» ıdeıasyn júzege asyrýǵa baǵyttalǵan bastamany qoldap, oǵan úlken qyzyǵýshylyq tanytyp otyr. Búginde atalǵan kitap berý pýnktiniń qorynda 2 000-nan astam kitap bar. Aldaǵy ýaqytta turǵyndardy keńinen qamtý jáne qala turǵyndary úshin kitaptyń qoljetimdiligin arttyrý maqsatynda qalanyń ózge aýdandaryndaǵy saýda ortalyqtarynda da kitap berý pýnktterin ashý josparlanyp otyr.
Jańa kitap berý pýnkti seısenbiden jeksenbige deıin saǵat 09:00-den 18:00-ge deıin jumys isteıdi. Jetisý aýdanynyń turǵyndary men «Adem» saýda ortalyǵyna kelýshilerdiń barlyǵyn jańa kitap berý pýnktine kelip, kóńilinen shyǵatyn kitapty tańdap, jańa týyndylarmen tanysýǵa shaqyramyz!
Aıta keteıik, búginde Almatyda barlyǵy 39 kitaphana jumys isteıdi. Onyń 30-y – qala kitaphanasy, 7-eýi táýlik boıy jumys isteıdi. Sonymen qatar qaladaǵy adam kóp jınalatyn oryndarda ózine-ózi qyzmet kórsetetin 32 derbes kitaphana ornalasqan.
