Almatyda sportty, mýzykany, zamanaýı tehnologıa men vızýaldy ónerdi toǵystyrǵan alǵashqy CYCLE FEST festıvali ótti. Bul týraly Almaty qalasy Sport basqarmasynyń ókilderi aıtty, - dep habarlaıdy alnews.
Festıváldiń basty oqıǵasy 300 adamnyń qatysqan ımmersıvti saıkl-shoý boldy. Mýzykalyq súıemeldeý, jaryq effektileri men vızýaldy ınstallásıalar aıasynda qatysýshylar bir mezette jattyǵý jasap, aýqymdy sınhrondy performanstyń bir bóligine aınaldy.
Festıvál barysynda qazaqstandyq ZAQ, Bonapart jáne Abyken Performance Show óner kórsetti.
Qonaqtar úshin ınteraktıvti alań, sporttyq jáne bı performanstary, kórsetilim baǵdarlamalary men oıyn-saýyq aımaǵy uıymdastyryldy. Keshtiń eń áserli sátteriniń biri arnaıy jedel áreket etý jasaǵy qyzmetkerleri kórsetken arnaıy daıyndyq pen qoıan-qoltyq urys boldy.
CYCLE FEST túrli jastaǵy ári dene daıyndyǵy ártúrli qatysýshylardyń basyn qosyp, almatylyqtardyń buqaralyq sportqa jáne belsendi demalystyń zamanaýı túrlerine qyzyǵýshylyǵy joǵary ekenin kórsetti.
Almaty qalasy Sport basqarmasynyń málimetinshe, CYCLE FEST — dene belsendiligi, mýzykalyq baǵdarlama jáne tehnologıalyq sheshimderdi bir formatta biriktirgen Qazaqstandaǵy alǵashqy sporttyq joba.
Mundaı is-sharalar turǵyndar arasynda salaýatty ómir saltyn nasıhattap, buqaralyq sportty damytýǵa jáne halyqty turaqty túrde sportpen aınalysýǵa yntalandyrýǵa múmkindik beredi.
