26-31 tamyz aralyǵynda Almatydaǵy Balýan Sholaq atyndaǵy Sport saraıynda qala ákimdiginiń qoldaýymen FIBA Azıa kýbogy – 2029 týrnıriniń aldyn ala irikteý kezeńi birinshi raýndynyń V tobyndaǵy machtary ótedi, - dep habarlaıdy alnews.
Qazaqstan 2029 jylǵy týrnırge qatysýshylardy anyqtaıtyn jańartylǵan irikteý júıesiniń bastapqy kezeńindegi oıyndardy alǵash ret qabyldap otyr. Bul týraly qalalyq Sport basqarmasynyń ókilderi aıtty.
Almaty osy raýndtyń machtary ótetin Ortalyq Azıadaǵy jalǵyz qala bolmaq. Dál osy kezeńniń machtary Dýbaıda (BAÁ), Serembanda (Malaızıa) jáne Ulan-Batyrda (Mońǵolıa) da uıymdastyrylady. Aldyn ala irikteýdiń birinshi raýndyna tórt topqa bólingen 18 ulttyq qurama qatysady.
Almatyda Qazaqstan quramasy Palestına, Shrı-Lanka, Maldıv araldary jáne Qyrǵyzstan komandalarymen kezdesedi. Týrnır aınalmaly júıe boıynsha ótip, toptaǵy úzdik úsh qurama aldyn ala irikteýdiń ekinshi raýndyna joldama alady.
Bul týrnır Qazaqstan quramasyna toptyq kezeńdegi barlyq kezdesýin óz alańynda, jankúıerleriniń qoldaýymen ótkizýge múmkindik beredi.
Ekinshi raýndtyń qorytyndysy boıynsha FIBA Azıa kýbogy – 2029 týrnıriniń irikteý kezeńinde jarysty jalǵastyratyn komandalar anyqtalady. Bul kezeńde olarǵa 2025 jyly Jıddada ótken týrnırge qatysqan 16 qurama qosylady.
Qazaqstan quramasy 1992 jyldan beri qurlyqtyq deńgeıdegi jarystarǵa qatysyp keledi. Komandanyń úzdik nátıjesi – 2007 jylǵy Azıa chempıonatyndaǵy tórtinshi oryn. Sol jarysta qazaqstandyqtar jartylaı fınalǵa deıin jetti. Aldyńǵy irikteý kezeńinde ulttyq qurama Úndistan men Katardy jeńgenimen, 2025 jylǵy Azıa kýbogynyń fınaldyq kezeńine shyǵa almady.
Almatyda aldyn ala irikteý machtarynyń ótýi qalanyń halyqaralyq basketbol baǵytyndaǵy bastamalarynyń jalǵasy bolmaq. Buǵan deıin Almatyda Ortalyq Azıa basketbol qaýymdastyǵy Úılestirý keńesiniń otyrysy ótken, al Qazaqstan ókilderi FIBA Asia qurylymdarynyń jumysyna qatysyp keledi.
Týrnır jas sportshylar men stýdentterge halyqaralyq deńgeıdegi basketbol básekesin tikeleı tamashalaýǵa múmkindik beredi. Elimizde alty óńirdiń jas basketbolshylaryn qamtıtyn NBA Kazakhstan baǵdarlamasy, sondaı-aq Ulttyq stýdenttik basketbol lıgasy jumys isteıdi, dep túsindirdi Almaty qalasynyń Sport basqarmasynyń ókilderi.
