Almaty qalasynda halyqtyń áleýmettik osal toptaryn turǵyn úımen qamtamasyz etý baǵytyndaǵy jumystar júıeli túrde jalǵasýda, - dep habarlaıdy alnews.
Osy maqsatta Almaty qalasynyń Qurylys basqarmasy áleýmettik osal sanattaǵy azamattardy turǵyn úımen qamtamasyz etý úshin 6 353 páterdi satyp alýdy josparlaǵan. Bul týraly Óńirlik komýnıkasıalar qyzmetinde ótken baspasóz konferensıasynda Qurylys basqarmasynyń basshysy Nurbol Nursaǵatov málimdedi.
Búgingi tańda 2 717 páter ýákiletti organnyń teńgerimine berildi. Taǵy 640 páterdi qabyldap alý jumystary júrgizilýde, olar boıynsha qabyldaý-tapsyrý aktilerine qol qoıylǵan. Jyl sońyna deıin barlyq páterdi ýákiletti organnyń teńgerimine tolyq berý josparlanyp otyr.
Sonymen qatar, Qazaqstan Respýblıkasynyń 2029 jylǵa deıingi turǵyn úı-kommýnaldyq ınfraqurylymdy damytý tujyrymdamasy aıasynda áleýmettik kredıttik turǵyn úı qurylysy jalǵasýda.
Qazirgi ýaqytta 2 246 páterge arnalǵan 29 kóppáterli turǵyn úıdiń qurylysy júrgizilýde.
Búginde 1 366 páterdi qamtıtyn 17 kóppáterli turǵyn úıdiń qurylysy tolyq aıaqtaldy.
Onyń ishinde:
• 7 turǵyn úı «Qalqaman-2» shaǵyn aýdanynda;
• 10 turǵyn úı «Jas-Qanat» shaǵyn aýdanynda ornalasqan.
Qazirgi ýaqytta paıdalanýǵa daıyn turǵyn úıler boıynsha tehnıkalyq pasporttardy rásimdeý jumystary júrgizilýde.
Al «Jas-Qanat» shaǵyn aýdanyndaǵy 880 páterge arnalǵan qalǵan 12 kóppáterli turǵyn úıdiń qurylysyn 2027 jyldyń II toqsanynda aıaqtaý josparlanyp otyr.
