Almaty qalasynda áleýmettik osal sanattaǵy jasóspirimder men jastardy qoldaýǵa jáne áleýmettendirýge baǵyttalǵan «Áleýmettik sheberhana» jobasy bastaldy, - dep habarlaıdy alnews.
Joba Almaty qalasy Jastar saıasaty basqarmasynyń qoldaýymen júzege asyrylýda.
Atalǵan bastama ata-anasynyń qamqorlyǵysyz qalǵan jáne ómirlik qıyn jaǵdaıǵa tap bolǵan jastardyń praktıkalyq daǵdylaryn qalyptastyrýǵa, olardyń jumyspen qamtylý deńgeıin arttyrýǵa baǵyttalǵan. Joba aıasynda qatysýshylar suranysqa ıe mamandyqtar boıynsha qysqa merzimdi oqytý kýrstarynan ótedi. Olardyń qatarynda barısta, aspaz, shashtaraz, mobılograf sıaqty baǵyttar bar.
Ótken jyly jobany iske asyrý nátıjesinde 120-dan astam jasóspirim oqytýdan ótti. Olardyń basym bóligi kýrstardy sátti aıaqtap, jumysqa ornalasý kezeńine ótti. Bul joba qatysýshylardyń áleýmettik beıimdelýine, kásibı jáne tulǵalyq daǵdylaryn damytýǵa oń áserin kórsetti.
Bıyl «Áleýmettik sheberhana» jobasy óz jumysyn jalǵastyryp, oqytý baǵyttaryn keńeıtýdi jáne qatysýshylar sanyn arttyrýdy kózdeıdi. Joba aıasynda tek oqytý ǵana emes, sonymen qatar qatysýshylardy jumysqa ornalastyrý kezeńinde súıemeldeý, JOO-na jáne OBBM-ne oqýǵa túsýge qoldaý kórsetý, tálimgerler men jumys berýshilermen ózara is-qımyl qarastyrylǵan.
Joba Almaty qalasynyń jastar saıasatyn damytý aıasyndaǵy júıeli jumystardyń bir bóligi bolyp tabylady jáne jastardyń barlyq sanattary úshin teń múmkindikter qalyptastyrýǵa baǵyttalǵan.
